ठुम्रार साहित्यिक बखेरी गजलकार तथा रेडियो कार्यक्रम प्रस्तोता सेवेन्द्र कुसुम्याहे सम्मानित कर्ले बा। फागुन ८ गते बखेरीके छत्तीसौ साहित्य श्रंृखला त्रिवि कीर्तिपुर परिसरमे हुइल कार्यक्रममे कुसुम्याहे सम्मानित कैगैलक हो। उहाँहे बर्का पहुना नेवा बस्ती नेवा स्कूल अभियानके संयोजक दीपक तुलाधर सम्मान पत्र डेलाँ। साथे, ठुम्रार साहित्यिक बखेरीके संयोजक कृष्णराज सर्वहारी उहे कार्यक्रममे बिक्री हुइल मेरमेरीक थारु किताबके बिक्री बापतके रकम १ हजार ७ सय ५० रुपैया हौसलास्वरुप कुसुम्याहे प्रदान कर्ला। हसुलिया–८, डम्मारा, कैलाली निवासी सेवेन्द्र कुसुम्याके उत्पादन तथा प्रस्तुतीमे ल्वाह्रल मन थारु साहित्यिक साप्ताहिक कार्यक्रम नेपालके १४ ठो एफएम रेडियो ओ अनलाइनमे प्रसारण हुइठ।
सम्मानित व्यक्तित्वके उपर प्रकाश पर्टी कवि/गीतकार सुशील चौधरी कहलाँ– रेडियोकर्मी सेवेन्द्र अनलाइन मार्फत् बिदेशमे समेत थारु साहित्यहे अडियो मार्फत् छिट्क्वइनामे लागल ओरसे उहाँ सम्मानके हकदार बटाँ। सम्मानित व्यक्तित्व सेवेन्द्र आपन कोठाहे स्टुडियो बनाके बँचल समय रेडियो कार्यक्रम उत्पादनमे लगैलक सम्झटी सम्मान कर्लकमे ठुम्रार साहित्यिक बखेरीहे धन्यवाद डेलाँ। सम्मानले साहित्यमे निरन्तर लागे पर्नामे थप जिम्मेवारी आइल उहाँ बटैलाँ।
कार्यक्रममे प्रकृतिपूजा चौधरी, भूमिका थारु, शिव शक्ति, दीपक चौधरी, नन्दु सर्वहित, रोशन रत्गैया, सरिता पछलडंग्या, फोन मार्फत् बर्दियाके स्रष्टा ठाकुर अकेला लगायत कविलोग आआपन रचना सुनैले रहिट। कार्यक्रममे पैल्हा फेरा उपस्थित हुइल नवलपरासीके शिक्षक ज्ञानेन्द्र महतो कीर्तिपुरके कार्यक्रमले आपन जिल्लामे कार्यक्रम करना उत्प्रेरणा मिलल बटैलाँ। बर्का पहुना दीपक तुलाधर राजधानीहस ठाउँमे निरन्तर तीन बरस थारु साहित्य शृंखला कर्लकमे आयोजक प्रशंसायोग्य बा कहटी भाषा जोगाइक लग थरुहट क्षेत्रके स्कूलमे थारु किताब लागु करे पर्नामे जोड डेलाँ।