प्रमुख तीन राजनीतिक दलले कैलालीको टीकापुरमा आज भएको घटनालाई राजनीतिक घटनाका रुपमा लिनै नसक्ने निष्कर्ष निकालेका छन्। टीकापुरमा भएको घटनाको समीक्षा गर्न संविधानसभा भवन नयाँ बानेश्वरमा आज साँझ बसेको तीन दलका शीर्ष नेताको बैठकले जनताको बाँच्न पाउने अधिकारको सुनिश्चितता हुने गरी सुरक्षाको प्रत्याभूति गराउन सरकारलाई सुझाव दिएको छ। उनीहरुले परिस्थितिलाई उत्तेजित तुल्याउने बोली र व्यवहार पनि कसैबाट पनि नगर्न आग्रहसमेत गरेका छन्।
यसैबीच यसअघि सत्तारुढ दल नेपाली कांग्रेस संसदीय दल र नेकपा (एमाले) स्थायी समितिको संविधानसभा भवनमै बसेको बैठकले कैलाली घटनालाई प्रायोजित रुपमा गराइएको निर्मम र निन्दनीय घटना बताएका छन्। ती दुवै दलले नेपाल सरकारलाई सुरक्षाको दायित्वलाई कुशलतापूर्वक सम्पादन गरी जनताको जिउधनको सुरक्षाको आवश्यक प्रबन्ध मिलाउन आग्रह गरेका छन्।
काँग्रेसका उपसभापति रामचन्द्र पौडेलले टीकापुर घटनालाई दुःखद र भत्सर्नायोग्य ठहर गर्दै संसदीय दलले त्यसप्रति खेद व्यक्त गरेको बताए।
कांग्रेस संसदीय दलले टीकापुरलगायत देशका विभिन्न ठाउँमा भएका हिंसात्मक घटनाप्रति अत्यन्त दुःख र खेद व्यक्त गर्दै त्यस्ता अप्रिय र अवाच्छित हिंसात्मक घटनाबाट पार्टीलाई मर्माहत र स्तब्ध तुल्याएको जनाएको छ। “राष्ट्रमा शान्ति, सुव्यवस्था कायम गर्न आफ्नो कर्तव्यपालन गर्दागर्दै वीरगति प्राप्त गर्ने वरिष्ठ सुरक्षा अधिकारी, सुरक्षाकर्मीलगायत निर्दोष नागरिकप्रति उच्च सम्मान व्यक्त गर्दै हार्दिक श्रद्धाञ्जलि र परिवारजनमा समवेदना प्रकट गर्नुका साथै घाइतेको शीघ्र स्वास्थ्यलाभको कामना गर्छ”–मुख्य सचेतक चीनकाजी श्रेष्ठले जारी गरेको संसदीय दलको विज्ञप्तिमा भनिएको छ।
एमाले संसदीय दलका प्रमुख सचेतक अग्नि खरेलले स्थायी समितिको बैठकले घटनालाई गम्भीरतापूर्वक लिँदै छानबिनका लागि समिति गठन गर्न माग गर्ने निर्णय गरेको बताए।
एकीकृत नेकपा (माओवादी) संसदीय दलले पनि उक्त घटनालाई सूक्ष्म विश्लेषण गरी जनताका मागलाई सम्बोधन गरेर अघि बढ्नुपर्ने निष्कर्ष निकालेको पार्टीका नेता एवम् सभासद् अग्नि सापकोटाले जानकारी दिए।
प्रमुख दलका शीर्ष नेताको मङ्गलबार बिहान बालुवाटारमा बस्ने बैठकले कैलाली घटनाबारेमा थप प्रस्ट पार्दै औपचारिक धारणा सार्वजनिक गर्ने तयारी गरिएको छ। रासस