प्ररिवारका सदस्यबाटै विन्दुको हत्याः प्रहरी

बारा- घरपरिवारले नै विन्दु ठाकुरको हत्या गरेको सोमबार कलैयामा प्रहरीले दाबी गरेको छ। विभिन्न प्रमाण प्रस्तुत गर्दै उपस्थित पत्रकारहरुलाई जिल्ला प्रहरी कार्यालय बाराका नायब उपरीक्षक विप्लव अधिकारीले भने, “बिहान पढ्न निस्केकी भनिएकी विन्दुका बारेमा परिवारजनको भनाइ बाझिएको, पढ्नका लागि भनेर विन्दु घर बाहिर निस्केको देख्ने कोही नभएको, मट्टीतेलको भाँडो घरभित्रै फेला परेको र घरभित्र घटना भएकै दिनमा लिपपोत गरेको अवस्थामा परिवारजनकै संलग्नता रहेको पुष्टि हुन्छ।”

नायब उपरीक्षक विप्लवले अगाडि भने, “डढेको विन्दुको शव भएको ठाउँमा उनका बुवा रामाले बोक्ने गरेको टर्चलाइट फेला पर्नु, विन्दुले लगाएको कुर्तासुरुवाल डढेको र त्यसको सल घरभित्रै भएको र पछि शवलाई छोप्न प्रयोग गरेको अवस्थामा पाइएको छ।”
हाम्रो अनुसन्धानले विन्दु हत्यामा परिवारजनकै संलग्नता रहेको तथ्य फेला परेको र बाँकी को–को संलग्न छन्, थप अनुसन्धानले पत्ता लाग्ने विप्लवले बताए।
आवश्यक अनुसन्धानका लागि प्रहरी नियन्त्रणमा रहेका विन्दुका बुवा रामा ठाकुरलाई अदालतबाट म्याद थप गरिएको छ। प्रस्टोका निवासी कक्षा १० मा अध्ययनरत छात्रा विन्दु ठाकुरको जलाएर हत्या गरेको शव परीक्षण प्रतिवेदन शङ्कास्पद भएकाले चिकित्सकहरुलाई कारबाहीको माग गर्न नेता तथा स्थानीयले आवाज उठाउन थालेका छन्।
जिल्ला अस्पताल कलैयाका चिकित्सकहरु प्रकृति ऊर्जा, राजु कुशवाह र अभिषेक सिंहले गरेको शव परीक्षणमा विन्दुलाई जलाएर मारेको उल्लेख छ। प्रतिवेदन अनुसार जलाएकी विन्दुको निसास्सिएर मृत्यु भएको हो।
पुस ११ गते बिहान घरबाट ७० मिटर टाढा बाँसघारी नजिकै उनको डढेको मृत शरीर फेला परेको थियो। सोही दिन शव परीक्षण गरी परिवारलाई शव बुझाइएको र मध्यरातमा दाहसंस्कार गरिएको थियो।
शरीरको बाहिरी भाग डढ्दैमा विन्दुको मृत्यु हुने सम्भावना कम रहेकाले उनलाई पहिले हत्या गरी पछि मट्टीतेल छर्केर आगो लगाएको हुन सक्ने जिल्ला प्रहरी कार्यालयका प्रहरी निरीक्षक रामनाथ घिमिरेले बताए। रासस

Leave a Reply

Your email address will not be published.