दाङ- थारु समुदायके भाषा, कला, सस्कृतिके संरक्षणमा थारु पत्रकारहुकने भारि योगदान रलक घोराहीमा अयोजित एक कार्यक्रमम बोल्ना बक्ताहुक्र जोडदेरख्ल। अत्वारक दिन्वा थारु पत्रकार संघ दाङ शाखाके त्यासर बार्षिक उत्वस तथा माघिमिलन कार्यक्रमम वोल्ना बक्ताहुक्र असिन बातम जोडदेलक हुइट। पछिल्लो समयम थारुन्हक भाषा, कला, सस्कृति लोप हुइटी गैइल चिन्ता व्यक्ति करटी असिन विषयम आम्हिन थारु पत्रकाहुक्र तदारुकताके साथ लाग पर्ना सुझाब देल।
थारु पत्रकार संघ दांङके अध्यक्ष सन्तोष दहितके अध्यक्षता तथा पुर्व राज्य मन्त्री महेश चौधरीके प्रमुख आतिथ्यम हुइलक कार्यक्रमम प्रमुख अतिथि चौधरी थारुन्क भाषा संरक्षण करकलाग आपन छुट्ट थारु भाषक पत्रिका निकार पर्ना बातम जोड देल। उहा कल –“थारु समुदाय सक्कुज मिल्क लग्ना हो कलसे दैनिक पत्रिका निकार्ना कत्रा भारि बात हो जे।’ …हम्र २०२८ सालम थारु भाषक गोचाली पत्रिका भारतम जाक छपाक फे घर घरम पुगाई। ओत्रा व्याला न त यातायात रह तन इन्टरनेट, फोनके सुविधा चौधरी कल’, आजकाल त सक्कु सुविधा बा उह फे अखिसके युवा हुक्र कुछ कर निसेक्ल गुनासो कर्ल।

कार्यक्रमम सभासद योगेन्द्र चौधरी, गंगा चौधरी, नेकपा एमालेके अध्यक्ष नरुला चौधरी, मुक्त कमलरी विकास मञ्चके कानुनी सल्लहाकार फकला थारु, नेपाल पत्रकार महासंघके केएल पीडित, बार एशोशियसनके अध्यक्ष रेशम गिरी, थारु पत्रकार संघके सल्लाहकार सविन प्रियाशन, प्रेस चौतारीके उपाध्यक्ष टिका वस्नेत, पत्रकार सुदरर्शन रिजाल लगायत शुभकामना मन्तव्य देल कलसे कार्यक्रमके सहजीकरण संघके सचिव सुनिता चौधरी कैरख्लही।

ओसहक उह कार्यक्रमम थारु भाषा, कला तथा सस्कृतिम योगदान पुगैना दाङके चार पत्रकारहुकन प्रमाण पत्र हो दोसल्ला ओढाके सम्मान कैगिल रह। पत्रकार माधव चौधरी, सुनिता चौधरी, लक्षिमा चौधरी ओ प्रकाश प्रिया कुशुम्याहन  प्रमुख अतिथी पुर्व राज्य मन्त्री महेश चौधरी कदर पत्र ओ दोसल्ला ओह्राक सम्मन कैलरलह। ओस्टक कार्यक्रमम द्धासर संविधान सभाके लाग समानुपातिम चयन हुइलक मधेशील लोक तान्त्रिक फोरमके योगेन्द्र चौधरी ओ थरुहट तराई पार्टिके गंगा चौधरीह टिका ओ खाडा लगाक बधाइ तथा सम्मान कैगिल रह।

ओसहक यीहसे आघ थारु पत्रकार संघ दाङके आपन तेस्रो वार्षिकोत्वसके अवसरमा फे मेरमह्रीक कार्यक्रम कैलरह। उह अवसरमा थारु पत्रकार संघ शुकदिन्वा घोराहीके रक्त संचार केन्द्रम जाक रक्त दान कार्यक्रमके अयोजना कर्लरह। उक्त रक्त दान कार्यक्रमम पत्रकार सन्तोष दहित, सुनिता चौधरी, केवि चौधरी, रोशन रत्गैया, पुरण प्रसाद चौधरी, दुर्गा प्रसाद चौधरी ओ सुरज बुढाथोकी लगायत रक्त दान देलरलह। रक्तदान पाछ थारु पत्रकार संघके अध्यक्ष सन्तोष दहित रक्तदान  नै जिवनदान हो कटि रक्तदान देना सक्कु पत्रकारहुकन धन्यवाद एवम कृतज्ञता व्यक्त कर्ल। ओस्टक शनिच्रक दिन्वा साहित्यक कार्यक्रमके अयोजना कर्ल रह। उ कार्यक्रमम दुइ दर्जन से ध्यार स्रष्टा हुक्र आ आपन प्रतिभा देखैलरलह। ओस्टक स्थापन दिवसके समापन कार्यक्रम भव्यरुपमा कैगिल।