अविनाश चौधरी, धनगढी- कैलालीके राजनीतिक दल आचार संहिता विपरीत निर्वाचन गतिविधिके लाग बालबच्चन प्रयोग नै कर्ना सामूहिक प्रतिबद्धता जनैले बटाँ। बालबच्चा भविष्यके कर्णधार रहल ओरसे ओइनमे नाकारात्मक असर पर्ना मेरिक संलग्नता नै करैना ओ ओइने लग्गे गतिविधि नै कर्ना वचनबद्धता दलहुक्रे करह हुईटैं।  एकीकृत नेकपा (मानओवादी) पार्टी कैलालीके प्रतिनीधि गोबिन्द बिक बालबच्चनके सवालमे आपन पार्टी गम्भिर रहल बटैंलैं। उहाँ अइना अगहन चार गते हुईना संविधान सभा निर्वाचन प्रचार प्रसारके क्रममे आपन पार्टी आचार संहिता विपरीत कौनौ फेन गतिविधि नै कर्ना जनैलाँ।
नेपाली काङ्ग्रेसके प्रतिनीधि छत्र बहादुर बडेला आपन पार्टी फेन बालबच्चनके अधिकारके सवालमे बहुत गम्भिर रहल बटैलाँ। उहाँ कहलैं–“बालबच्चनके हीतके लाग हमार पार्टी गम्भिर बा। हम्रे आचार संहिता विपरीतके काम नै कर्ना ओ करे नै देना कहिके पार्टी आबद्ध सक्कु जन्हन निर्देश कर्ले बटी।” चुनावमे बालबच्चा सहभागि नै हुइना कार्य सक्कु पार्टी मनन् कर्लेसे फेन कबुकाल बच्चा अप्नेहे घुसपैठ करल ओरसे येमे चुनौती थपल नेकपा एमालेके प्रतिनीधि खेमराज पाण्डेय बटैलाँ। उहाँ बालबच्चाहुक्रन दलीय गतिविधिसे दुर रख्नामे आपन पार्टी कटिबद्ध रहल उल्लेख कैलाँ।
मधेसी जनाधिकार फोरम (लोकतान्त्रिक) के कैलाली उपाध्यक्ष विश्वम्भर झा आचार संहिता सबसे भारी बात रहल ओरसे आपन पार्टी ऊहे अनुसार चल्टी रहल ओ अइना दिनमे फेन प्रतिबद्ध रहना बटैलैं।  अब्बेके आवश्यकता निष्ठा ओ इमान्दारीताके राजनीति रहल अखण्ड नेपाल पार्टीके हरि रेग्मी चर्चा कर्ला। कैलाली क्षेत्र नम्बर ६ के उम्मेदवार समेत रहल उहाँ २१ औं शताब्दी सुहाईल आपन पार्टी गठन हुईल कहती थप्लैं–“बालबच्चनके अधिकार रक्षाके लाग हमार पार्टी विद्यालयमे भातृ संगठन समेत नै बनैना निर्णय कर्ले बा।”
उहाँ राजनीतिमे लागल अभिभावकहुक्रनके कारण फेन बालबच्चा लोग चुनावी गतिविधिमे प्रत्यक्ष वा अप्रत्यक्ष रुपमे संलग्न हुइटी रहल बटैलाँ। छोट दलसे फेन भारी दल आपन जित सुनिश्चितताके लाग चहाजैसिन हत्कण्डा कर्ती रहल रेग्मी बटैलाँ।
उपस्थित राजनीतिक दलहुक्रे चुनावमे बालबच्चन प्रयोग नै कर्ना कहिके लिखित प्रतिबद्धता जनैलाँ। यद्यपि, सक्कु पार्टीके सहभागिता नै रहे।
निर्वाचन आचार संहिता २०७० के परिच्छेद दुई मे विद्यार्थीनके पढाई अवरोध हुइना मेरिक राजनीतिक दल जुलुस, आमसभा करे नै पैना, विद्यालयके भित्तामे पर्चा, पम्पलेट टाँसे नै पैना उल्लेख बा। ओस्तके, बालबालिका सम्बन्धीं तमाम राष्ट्रिय ओ अन्तराष्ट्रिय महासन्धी, सन्धीमे ओइन चुनावी गतिविधिमे प्रयोग नै कर्ना उल्लेख हुईल बा।
दलहुक्रे एकखालके प्रतिबद्धता जनैलेसे फेन कार्यक्षेत्रमे प्रभावकारी कार्यन्वयन नै हुइल राष्ट्रिय मानव अधिकार आयोग क्षेत्रीय कार्यालय धनगढीके पवन कुमार भट्ट बटैलैं। उहाँ यी क्षेत्रमे बालबच्चन विगतमे फेन प्रयोग कैगिल ओ अब्बे फेन कर्टी रहल जनैलाँ।
बितल दिनमे ज्या जसिन हुईलेसे फेन ओइसिन गल्ती नै दोहोर्‍यैना दलहुक्रन अर्जी कर्टी भट्ट कहलैं–“आचार संहिता कार्यन्वयनके पाटोहे दलहुक्रे ध्यान देना जरुरी बा।” संविधान सभाके दोसर निर्वाचनके क्रममे बालबच्चनके अधिकारहे दलहुक्रे अधिकतम् ख्याल करे पर्ना उद्देश्यके साथ राष्ट्रिय निर्वाचन पर्यवेक्षण समिति ओ चाइल्ड नेपाल (सीएन) दलहुक्रन सामूहिक प्रतिबद्धता कर्वाईल हो।