कृष्णराज सर्वहारी।
संघरियनसे बिच बिचमे चाय पिना बहानामे जमघट हुइठ । एकठो हमार संघरिया बावइ । कौनो बाट बट्वइबो, केक्रो उडाहरन डेबो, टैँ फेन ओस्टे कैले से कसिन हुइ ? कबो कलेसे उ बरा लम्बा चौरि ब्याख्या कर्टि कहठ, ‘मै का उ हुँ यार ?’ ओहेसे ओकर नावै संघरियन ‘मै का उ हुँ यार’ ढैडेले बटाँ ।

एक डिन बाट उठल । गोपाल दहित टे पिएचडि कै ढर्लां । नेटा मनै हुँखिन माने परि । हेर्टि हेर्टि डाक्टर बन्गैँला यार । टै फेन पिएचडि कर ।
उ लागल ब्रेक नै लग्ना गाडिहस् बर्बराए, ‘मै का उ हुँ यार । बिना पेंडिक लोटा हस । थरुहट तराई पार्टि खोल्ला, हिरोनि सोनु थारुक मुरिम ढकिया ढराके भोट मँग्ला । बाडमे ‘राम राम’ कहक छोरके ‘नमस्टे नमस्टे’ कहिके गच्छदारके सँगे लोकतान्त्रिक फोरममे चलगैलाँ । ओट्रासम टे ठिके रहे, मने गच्छदार काँग्रेसमे गैल टे ओहो ‘जय नेपाल’ कहटि काँग्रेसमे चलागैलाँ । काँग्रेससे सांसड उठ्लाँ । का जनटा पट्यइलिन् ? आब सुनटुँ नेटागिरि छोरके बैँकके सिइओ बने चलागैल बटाँ । मै का उ हुँ यार ?

बाट प्रस्ट रहे उ नेटा गोपाल दहितके बाट कर्टेहे । हमार मढ्ये एकठो डोसर संघरिया कहलाँ, ‘ना जोस्सा ना यार । टुहि पिएचडि कर्ना सल्लाह डेलि टे टैं सस्सुर बाटके बटंग्गर बना डेले । बाट नेटागिरि ओर लगैले ।’

उ फे लागल बर्बराइ, ‘नेटागिरिके बाट का नै कहम यार । मै का उ हुँ यार ? एकठो बाट टे छुटि गैल रहे । सब्से पहिल टे उ राजापुरसे हर चिन्हमे राप्रपासे उठल रहिँट । थरुहट तराई पार्टी छोरके लक्ष्मण थारु, योगेन्द्र चौधरी फोरम लोकतान्त्रिकमे गैलाँ टे ओइन गड्डार कहलाँ । ओहे गड्डारनके मुह सुंघटि, पुछिँ हिलैटि अपने फे फोरम लोकतान्त्रिकमे गैला । टब उ महागड्डार ठहरलाँ कि नै ? जनटन उल्क्वाके आब फे नेटागिरि छोरके जग्रि खाइ चलगैलाँ । इहिसे भारि गड्डारि आउर का हुइ सेकि । मै का उ हुँ यार ।’

हम्रे सब चाइ पिके सेक रख्ले रहि । ‘मै का उ हुँ यार’ संघरियक टाटुल चाइ जुर हो सेकल रहिस । उ अभिन पिले नै रहे ।
मै कलु, ‘अरे भइया । चाइ टे जुर हो सेकल । टैँ का करे गर्माइटे ? चल आज जुर चाइ पिइ ओ डिस्कोमे डान्स करे चलि ।’
सब संघरियन हो मे हो मिलैटि कहलाँ, ‘अरे यार कुमारके प्रस्टाव बहुट ठिक बाटिन । डिमाग चौकस नै हुइल फेन बहुट ढेर डिन हो राखल । चलि चलि अनारकलिक नाच हेरे डिस्को चलि ।’

फोहैटि चलि टे चलि कहि कि कलक टे ‘मैँ का उ हुँ यार’ संघरिया ठाह्रे इन्कार कैडहेल । बम्के लागल, ‘मै का उ हुँ यार । डिस्को जैना, बठिन्यनसँग रासलिला कैना । बागबाजारसे रंगे हाँठ पकरवा पैना । ओट्रा भारि नेटक इज्जट कहाँ गैलिन् ?’

 

आकुर पन्वा डारल, ‘आउर टे आउर, सेक्स युद्ध र जेल किटाब लिख्के बठिन्यनसँग रासलिला कैलक् गुछछर्रा उडैना । मै का उ हुँ यार ?’
बाट स्पस्ट रहे कि उ टीकापुर घटनाके आरोपमे जेलमे रहल नेटा लक्ष्मण थारुक् बाट करटा ।
मै कलुँ, ‘अरे भाइ । कहाँ डिस्को जैना बाट । कहाँ इ रन्डिबाजिक बाट उठा डेले । टैँ टे सक्हुन पानिम बिलोरे लग्ले । सब मजा किरकिरा बनाडेले । बिचारा टीकापुर घटनम नै हुइलक आरोप लगाके जेलमे बटाँ, उ नेटन टे ना सराप टैँ ?’
उ झोक्काइल, ‘का नै सरापम् यार । इहे नेटन टे थरुहट आन्डोलनहे रन्डि हस नचा डेलाँ । रन्डिक जवानिमे डम रठिस । बुह्राइलमे रन्डिहे के पुछि ? नेटनके कारन थरुहट आन्दोलन फे जवानेम खोक्टागैल, बुह्रागैल । आब इहि के पुछिँ ? डेख्टो कि नाइ, थरुहट आन्डोलनके उपलब्ढि सस्सुर खालि थारु आयोग बनाके टुहा डेलाँ । ना थारुन्के क्लस्टर मिलल, न थारु मुख्य मन्त्रि बन्लाँ । आब थारु आयोग कुछ मनैन्के लग डारु पिना आयोग बनि ।’

हम्रे कलि, ‘उहे टे हम्रे टुहि डारु पिएक अफर करटि ।’
उ टे आउर फुन्ना जोरे लागल, ‘मै का उ सर्वहारी हुँ यार, कोइ डारु पिए लोभ्वइटि कि डौर पर्ना ?’
डोसर संघरिया कहलाँ, ‘अरे सर्वहारी टे कप्के डारु छोर रख्लाँ । हुँखिन का लपेटटे ?’
उ बरे घरि हाँसल । हाँसि ठम्हैटि कहल, ‘मै का उ हुँ यार, जा कलेसे पट्या जैना । टुहरे हाँसि ना टे लगैहो रेउ । सब कुक्कुर काशी जैहि टे यहाँ गुह के खाइ ? सर्वहारिया कहुँ जाँर डारु छोरि ?’
सल्लाह हुइल कि चलो जुर चाइ पियक बाट नै बन्ठो कलेसे फे डोस्रे एक एक कप टाटुल चाइ जो पिइ ।
डोसर संघरिया बटाँ खिटकोर्ला, ‘अरे यार थारु कल्याण कारिणी सभक् २२औं अधिवेसन काठमाडाँैमे हुइटा । हमार कोइ केन्ड्रिय अढ्यच्छके उम्मेडवार नै हो ?’

अभिन सम मुह चब्डल संघरिया कहल, ‘अरे पुरान अढ्यच्छ धनिराम चौधरी ओ चितवनके विश्राम महतोक् डबनि भिराउ हो रख्लिन कटि । डोसर ओर लेखी फेन पख्रा सुरुक्के अढ्यच्छ बनम कहटि बटाँ । हम्रे कहाँ फाँट परे जैना हो ।’ मै का उँ हु यार संघरियाहे डेखैटि उ टिबोलि मारल, ‘कि टो यि संघरिया उठहि चाहे ?’
उ टे जोस्सा गइल, ‘मै का करे थाकसके अढ्यच्छ उठुँ । मै का उ हुँ यार । काठमाडौँमे थाकसके घर बना डेम कहिके अढ्यच्छ बन्ना । मने बाचा पुरा नै कर्ना ?’

हम्रे कलि, ‘अरे उ टे अष्टभुजा प्रसाद चौधरी रहिँट । बिचारा भगवानक् घरे गइ सेक्ला । मुँवल मनैन्के बाट का बट्वाइटे टैं ।’
मै का उ हुँ यार संघरिया कहल, ‘मै बिच्चेम बठ्वाइ लग्ठुँ टे टुहरे मोर बाट हेगे बेरिक लेर्किहस चट्से टे ना काट डे हो । मै आबक अढ्यच्छ धनिराम चौधरीक् बाट बट्वाइटु । ओहो टे झापामे थाकस अढ्यच्छके सपठ खाइबेर थाकसके घर बनाडेम कले रहिँट । कले रहिँट कि नाइ ? मने कानेम टेल डारके सुट गैलाँ । थाकसके घर बना डेब कना स्वतन्त्र व्यक्टि अइलाँ । मने ओइनके घर बनैना कोसके छुट्टे खाटा रना चाहि कना आवाज सुनुवाइ नै हुइलिन । आज इन्जिनियर विद्यानन्द लेखीक् अग्वाइमे काठमाडौमे थारुन्के सामुहिक घर बनैना संस्ठा खोले पर्ना अवस्ठा आइल ।’

हम्रे कलि, ‘धनिरामहे फेन टे टीकापुर आन्डोलनके डोसि बनाके मुड्डा लगा डेलिन जे । बिचारा अपन घरे टे बैठे नै पाइ ठुँइट । कहाँ से घर बना डिहि थाकसके । हुँकार समस्या फेन टे बुझ् ।’
मने उ समस्या नै बुझल । कहे लागल, ‘सुन्टु अप्कि फेन उहे घर बना डेम कहिके सपना डेखाके अढ्यच्छ उठ्टि बटाँ रे । गैरथारु नेटा टे हमार सपनम खेल्वार कर्लाँ, कर्ला । इ थारु अगुवा फेन हमरिहिन सपना डेखाके मारे लग्लाँ । मै का उ हुँ यार घर बनैना सपना डेखाके अढयच्छ बन्ना ?’

ह्म्रे कहली अरे चितवनके विश्राम महतो ते कौनो सपना नै डेखैले हुइट ।
ए कहल, ‘मै का उ हुँ यार । अपन हैसियट नै हेर्ना । जे उस्काइल उसुक जैना ? उ विश्राम महतो अपन जिल्लक अढ्यच्छमे टे हट गैला । उ केन्ड्रिय अढ्यच्छ का ले पैंहि । उहे झापाके २१ आँे महाढिवेशनमे राजेन्द्रप्रसाद चौधरीक् ४ भोट आइहस अइहिन । लाजक ठोप्रा । मै का उ हुँ यार, लाजक् ठोप्रा बने जैना ।’

साँझ पच्पचैले झमझमजाइटेहे । उ डिनके चाय गफ ओराइल ।
अन्टमे पुँछ गैल मै का उ हुँ यार ठेगो कना सँघरियाहे, ‘टुहि जा कहबो टे मै फेन मै का उ हुँ यार कहिके लम्वा चौरि बाट लैजैठे । मने कौनो बाटमे सहमट नै हुइठे । अच्छा बटा टोर असलि परिचय का हो । टै के हुइस ?’
‘मै मै…’

हम्रे झोक्कैलि, ‘का मैँ मैँ छेग्रिहस बोलटे ?’
उ टे हमरिहिन से उल्टे पुछे लागल, ‘पहिले टुहरे बटाउ सारन् । टुहरे के होउ ? बेकारमे महि फसाइटो । मै का रेशम चौधरी हुँ यार, पार्टिक नेट्न सांसदमे सपठ ग्रहन कराडिहि कैहके आत्मसमर्पन कर्ना । टुहिनके पुछल बाटेम समर्पन कर्ना ।’
हम्रे जोर डेलि, ‘पहिले टहिं बटा ना । टैँ के हुइस । अपन मुल्यांकन कसिन कर्ठे ?’
उ आज पहिलि बार स्पस्ट सब्दमे कहल, ‘मै टे मै हुँ यार । मोर टुलना कुहिसे नै हुइ ।’

पाठकलोग, कोइ अपन टुलना कुहिसे हुइल डेखक नै चाहठ । अपनेक टुलना बरा मनैनन्से सहि सलामट सकाराट्मक ढंगसे हुइल बा कले से उ ठिक । डान्चे फे भिलेन पात्रसे अपनिक टुलना हुइल बा कलेसे उ गलट सोच जाइठ । मै का उ हुँ यार कना ठेगो अपने भल्हि उप्रे उप्रे कहे नै सेक्ठुइबि भिट्रे भिट्रे टे जरुर उ सब्द बेलस ठुइबि ।

हम्रे गफ लगैटि किया मेसे उँटरलि । गारि भारा के डेना कना बाट आइल । ठेगोवाला संघरियाहे कलि, ‘आझ टे भारा टैं टिर भइया । डिस्को जैना प्रोगाम केन्सिल करवइले बटे ।’

उ अपन भरिक भारा खलासिहे डेटि कहल, ‘मै का उ हुँ यार । चम्पनके अढ्यच्छ नन्दुराज चौधरी । सबके खाइल पैसा टिर्टिजैना । गारिक सिटेम अपन चुट्टर जोँटैलक पैसा अपने अपने टिरो सारन् ।’

फुरेसे कहटुँ । बगालमे एकठो फटकार डिठार मनै हुइना चाहि । मुँहेम पाप नै रना, छल कपट नै जन्ना, ‘मैँ का उ हुँ यार’ संघरिया हस । उ संघरिया भेटघाटमे नै रहठ टे महा सुनासान पो लागठ ।
(प्रकासोन्मुख हाँस्य व्यग्ंय संग्रहः एकठो गोरुवक् बटकुहिसे)