थारु युवा सभा केन्द्रीय समितिले वर्तमान सरकारमा थारु समुदायको प्रतिनिधित्व नभए कडा आन्दोलन गर्ने चेतावनी दिएको छ। मन्त्रिमण्डल विस्तारको पूर्व सन्ध्यामा पत्रकार सम्मेलनमा  गर्दै समितिले यस्तो चेतावनी दिएको हो। समितिका अध्यक्ष कानुनलाल चौधरीले राज्यले थारु समूदायलाई उपेक्षा गरिरहेको इतिहाँस स्मरण गराउँदै भने, ‘एमाले अध्यक्ष केपी शर्मा ओलीको नेतृत्वमा वाम गठबन्धनको सरकार बनेको छ, तर अहिलेसम्म एक जना पनि थारु मन्त्री बनेका छैनन्, बजारको हल्ला सुन्दा एमाले र माओवादी दुवै पार्टीले थारु समदायबाट एक जनालाई पनि पूर्ण मन्त्री बनाउनेजस्तो देखिएको छैन, यस्तो अवस्थामा हामी खबरदारी गर्न आज एक्कासी यो क्लबमा भेला भएका छौं।’

‘देशमै अहिले हामी थारु समूदाय करिब ७ प्रतिशत छौं, तर विगतदेखिको Oतिहाँस हेर्दा हामीलाई सरकारमा सहभागी गराएर देश हाँक्ने जिम्मा दिन सरकारका नेतृत्व गरेकाहरुले कञ्जुस्याँई गर्नुभएकै हो, मुलुकको यो ७० वर्ष लामो लोकतान्त्रिक आन्दोलनमा थारु समूदायको महत्वपूर्ण योगदान छ, थारुका छोराछोरीले रगत र पसिना बगाएका छन्, तर हामीले कहिल्यैपनि यो दिनुहोस्, त्यो दिनुहोस् भनेर विगतमा माँगेनौं, अहिले मुलुक संघीय संरचनामा गएको छ, समावेशी–समानुपातिक सिद्धान्त अनुसार पनि हाम्रो समूदायलाई सरकारको प्रतिनिधित्वमा समेट्नुपर्छ,’ उनले भने।

वाम गठबबन्धनको नेतृत्वमा बनेको वर्तमान सरकारले थारु समदायलाई सम्बोधन गर्नेगरी एक जना पनि फुल मन्त्री नबनाए आफूहरुको भावना र सिँगो समावेशिताको भावनामाथि चोट पुग्ने उनको गुनासो थियो ।

कार्यक्रममा नेकपा एमालेकी केन्द्रीय सदस्य भगवती चौधरीले अब हुने मन्त्रिमण्डल विस्तारमा एमाले र माओवादी केन्द्रबाट कम्तिमा एक जना थारु सभासदलाई फुल मन्त्री बनाउन प्रधानमन्त्री केपी शर्मा ओलीलाई आग्रह गरेकी छन्। ‘सरकारमा थारु समुदायलाई पनि सहभागिता गराउनुपर्छ भनेर मैले प्रधानमन्त्रीज्यूले भेटेकी थिएँ, उहाँले सकेसम्म समावेशीता अनुसार नै मन्त्रिमण्डल विस्तार गर्छु भनेर वचन दिनुभएको छ, उहाँको सोच त सहभागी गराउने नै रहेको मैले पाएको छु, तर सम्भावना हेर्दा एमालेबाट बन्ने देखिँदैन्, अब सम्भावना माओवादी केन्द्रबाट छ, अहिले मिडियामा आएको नाम हेर्दा अमनलाल मोदीको नाम छ, उहाँलाई राज्य वा सहायक मन्त्री भन्दापनि फुल मन्त्री बनाउनुपर्छ,’ उनले भनिन्।

त्यस्तै थारु अभियन्ता सुरेन्द्र चौधरीले सरकारमा थारु समूदायको सहभागिता सम्मानजनक रुपमा हुनुपर्ने बताए। चौधरीले भने, ‘संविधान बनाउन, गणतन्त्र ल्याउन महत्वपूर्ण भूमिका निर्वाह गरेको थारु समुदायलाई वर्तमान वाम गठबन्धनको सरकारमा सम्मानजनक रुपमा सहभागी गराउनुपर्छ, यसको लागि म यही मञ्चबाट सरकारको ध्यानाकार्षण गराउन चाहन्छु।’

उनले सहायक वा राज्यमन्त्री दिए त्यसमा सहभागी नहुन थारु सांसदहरुलाई समेत आग्रह गरे। उनले भने, ‘फेरि पनि थारुहरुलाई राज्यमन्त्री दिने कुरा सुन्दैछु, यो गलत हुन्छ, हाम्रो भावनामाथि ठेस पुग्छ, त्यसैले म थारु सभासदहरुलाई पनि आग्रह गर्छु, राज्यमन्त्री दिए नखानुहोस्।’

चौधरीले आफूहरुको मौनतालाई कमजोरीको रुपमा नलिन पनि सरकारलाई आग्रह गरे । उनले भने,‘हामी अहिले पर्ख र हेरको अवस्थामा छौं, अब मुलुक नयाँ युगमा प्रवेश गरेको छ, नयाँ युगमा नयाँ सरकार बनेको छ, हामी यो सरकारलाई पूर्ण साथ र सहयोग गर्छौ।’ यद्धपी उनले अब हुने मन्त्रिमण्डल विस्तारमा थारु समूदायलाई समावेश नगरी त्यो मुलुक, सरकार र सरकारमा रहेका दलहरुलाई पनि घातक हुने चेतावनी दिए ।

उनले अघि भने,‘जितेर आएका थारु सांसदलाई पनि हामीले पार्टीको झोले राजनीति गर्न पठाएको होईन, राज्यमन्त्री दिईए सपथ नै नखानुहोस्।’

थारु कल्याणकारिणी सभा उपत्यका सचिव तुलसी थारुले पनि सरकारमा थारु समूदायको सहभागिता अनिवार्य हुनुपर्नेमा जोड दिएका थिए । उनले प्रदेश सरकारमा ७ वटा सरकारमा एक जना पनि मुख्यमन्त्री नबनाईएको भन्दै गुनासो पोखे ।

थारुले भने,‘अब हुने मन्त्रिमण्डल विस्तारमा थारुलाई स्थान दिएन हामी विकल्प खोज्न बाध्य हुन्छौं।’