थारु कल्याणकारिणी सभाको दुई दिने राष्ट्रिय भेला आजदेखि नवलपरासीको डन्डामा सुरु हुँदैछ। थारु आन्दोलनलाई अझ सशक्तरुपले उचाइमा पुर्याउन राष्ट्रिय भेला बोलाएको सभाले जनाएको छ।
भेलामा काठमाडौं उपत्यका र तराईका हरेक जिल्लाका थारु आन्दोलन परिचालन समितिका संयोजक र कमान्डरहरु सहभागी हुनेछन्। भेलामा करिब डेढ सय जनाको सहभागिता रहने सभाले जनाएको छ।
भेलामा थारु आन्दोलनलाई अझै सशक्तरुपले अगाडि बढाउनेबारे रणनीति बनाउने र संयोजक तथा कमान्डरहरुलाई त्यहीअनुरुपको प्रशिक्षण दिने थारु कल्याणकारिणी सभा आन्दोलन परिचालन समितिका संयोजक राजकुमार लेखीले जानकारी दिए। उनले अबको आन्दोलन सीमा नाकामा कडाइ गर्ने रहेको बताए। ‘आन्दोलनको स्वरुप र रणनीति तय गर्न राष्ट्रिय भेला डाकेका हौं,’ लेखीले भने, ‘सहभागी जिल्ला संयोजक र कमान्डरहरुलाई सीमाकेन्द्रीत आन्दोलनाई सशक्त बनाउनेबारे प्रशिक्षणसमेत दिइनेछ।’