पार्वती डिसी चौधर नेपाली काँग्रेसके केन्द्रिय सदस्य हुइ। उहाँ संविधान सभा–२ के निर्वाचनमे दाङदेउखुरी क्षेत्र नं १ से एमाले प्रतिद्वन्द्वी रेवतीरमण शर्माहे हटाके सभासद निर्वाचित हुइल वटी। २०७० फागुन ३ गते बागबजारमे थारू विद्यार्थी समाजके आयोजना करल थारू सभासद लोगन्के स्वागत ओ बधाई कार्यक्रममे आइल बेला उहाँसे कृष्णराज सर्वहारी बात बत्वइले रहिँट। प्रस्तुत बा, ओकर सारसंक्षेपः
अपनेन टे सभासदके चिठ्ठे परल कि का हो?
चिठ्ठा परल नै हो। खुमबहादुर खड्का के धर्मपत्नी शीला खड्का हे डेगैल प्रत्यक्ष के टिकट उहाँ नै स्विकारल कारण मही डे गैल। मै वकायदा चुनाव लरके जित्लक हो। बेेन समानुपातिक सभासद मे परुइयन चिठ्ठा पर्लक हुइट।
पार्टीक केन्द्रिय समितिक् बैठकमे अपनेन चुनाव हरैना खेलमे लग्लक् कारण खुमबहादुर खड्काके टे अपने राजीनामा समेत माँगल सुनगैल जे?
यी सही बात नै हो। मै उहाँक् राजीनामा मँग्लक् नै हो। उहाँक् धर्मपत्नी शीला खड्का क्षेत्र नं १ से समानुपातिक उम्मेद्धार हूइलो पर भोट फेन डारे नै गैली। दाङके कौनो क्षेत्रमे पार्टीक ओर्से बागी उम्मेद्वार नै रना, मोर क्षेत्रम किल काजे बागी उम्मेद्वार? खड्काके भाइ भतिजालोग वागी उम्मेद्वारके पक्षमे का करे लविंङ कर्ला? सतबरिया ईकाइ समितिक् अध्यक्ष तिलकराम केसी चुनावमे विरोधी भूमिका खेलुइयन् कार्वाहीक् बात उठाइ बेर उहाँक घरेम गोली चला गइल। खड्काके भाइ भतिजालोगनसे लेउ हम्रहिन के कार्वाही करी कैहके बैठक जो बैठे नै डेगैल। यी सबके छानवीनके लग मै बात उठैलक हो। खड्काजीके राजीनामा मंग्लक् नै हो।
थारू आदिवासी जनजाति हुइट। अपनेक लैहर परिवार डिसी रलेसे फेन थारू से भोज कर्लक कारण अपने फेन जनजाति जो हुइली। मने पार्टीक केन्द्रिय सदस्य लरेबेर मधेसी कोटामे का करे चुनाव लरली? संविधान सभाके चुनावमे कांग्रेसके समानुपातिक सभासद काजे मधेशी कोटामे छानगैलाँ?
कांग्रेसके चुनावी विधानमे थारून् मधेसीमे फेन ढै गैल बा। का करे कि देव गुरुङ स्थानीय विकास मन्त्री रहलबेला प्रस्तुत कैगैल विधेयक तराईके थारू लगायत जनजातिहे मधेसीमे फेन सूचीकरण कर्ना यी अध्यादेश अभिनसम फिर्ता नै हुइल हो। उ अनुदार मै किल नै उमाकान्त चौधरी (बारा) फेन मधेसी कोटामे जो केन्द्रिय सदस्य बन्लाँ। हमार पार्टी कांग्रेस किल नाही, अप्की संविधान सभाके चुनावमे एमाले लगायतके थारू मधेसी कोटामे समानुपातिक सभासद छान गैल बटाँ। उहेसे यी मोर सवाल किल नाही समग्र थारू समुदायके प्रतिनिधीलोगनके सवाल हो। मै संसदमे भाग लेहेबेर कुछ थारून् अपने मधेसी हुइलमे गर्व कर्लक आवाज फेन सुन्लुँ।
दाङ क्षेत्र नं १ प्रतिनिधित्व करटी रहल खुमबहादुर खड्का अपन पालम् ढेर विकास करल श्रेय पैले बटाँ। यी संविधान बनैना चुनाव हो। मने विकासके बात फेन संगसंगे जोरके आइठ। अपने का का विकासके प्याकेज अपन क्षेत्रम् लैजैना सोच्ले बटी?
विकास पार्टीगत अवाधारणासे आगे बह्रना हो, नकि व्यक्तिगत। पैल्है अपन क्षेत्रमे खड्काजी विकास कर्ला, हुँखिन पार्टी सभासद, मन्त्री बनाइल, टब ना कर्ला। ओहेसे दाङमे हुइल विकास खड्का नाही कि काँग्रेस करल कना बुझना चाही। मै फेन आपन क्षेत्रके विकासके लग जरुर लागम्।
सभासद, नेपाली कांग्रेस
क्षेत्र नं १ दाङदेउखुरी