सागर कुश्मी ‘संगत’- बुडीक् रोटीपानी ओर्वाके गाउँसे धनगढी ओर लग्लुँ। परम प्यारीहे डेरम् पुगाके मुटसले जन्तीराम जीहे फोन करलुँ। उहाँक निर्देशन अनुसार राजधानीसे पहुना लोग आसेकल ओरसे महिहे सन्‰यासम भादा गाउँ पुग्ही पर्ना बाध्यता हुइल।
ना साइकिल ना भरभड्डा, भादा पुग्ना लगा सेक्ले रहुँ हरबड्डा। आब हुइल कर्रा, कुछ समझमे नै आके उँखारे लग्लुँ ढर्रा। टबसम् टे छुटकी भैयक् टंकी हाउसफूल होसेकल रहिस्।
हडबडैटी गोझुमसे मनरख्नीक डेहल मोबाइल निकरलुँ। छविलाल कोपिलाहे फोन करलुँ। उहाँ फोन उठैटी हेलो कहलाँ। मै फे एहोरसे बोल्लुँ–हाँ गोचा कहाँ पुग्ली? सुख्खर पुग्गिलुँ उहाँक जवाफ आइल। फेंन डोसरो सोम डेमनडौंरा हे फोन करलुँ। उहाँ कहलाँ ठाकुर अकेलासे सँग बटी, चिसापानी पुगल बटी। मै कहलुँ ठीके बा, आइल करी साँझके गन्तव्य ओर भेंट होजाबी।
अस्टे–अस्टे बात मनेम् खेल्टी रहे कि ठिक्के पर आशाराम जी के फोंन आइल। उहाँ कहलाँ सर कहाँ बटी? धनगढी मै प्रश्नक जवाफ घुमैलु। फेंन मै कहलुँ–टबटे सँगे जाबी, भेंट हुइली साथी संचार डेस्कटपमे। डोसर संघरीया तेज जी हे बलैलुँ।
साथी संचार डेस्कटपमसे सरसामान लेली, अपन–अपन झोला झम्पट कन्ढ्यइली ओ सरासर लग्ली तीनुजे क्याम्पस रोडके बस अड्डा ओर। मन आर्टस्मसे कार्यक्रमके लाग ब्यानर ओनर लेली, गैली बस पकरे।
लटर पटर करटे–करटे बेर होगैल रहे। बसफेंन छुटगैल। काउन्टरमे पुछ्ली बस टे गइसकेल काउन्टरवाला कहल। डोसर बस आब ४ बजे किल नेंगी। हमारठेंन बसके अस्रा लग्ना ट्याम नै रहे। वहाँसे फें सरासर नम्ली। दिन पचपच–पचपच बुरटी रहे। बस ठर्‍हयाइल सामान लोड कर्ती रहे। हलिहली डौरटी बस पुग्ली। बश ओहे बसम् सिन्की हुरेहस हुरे परल। ठनिक्के बस छुट्जाइटहे। बसक कन्डेक्टर कोहि्रया बरा कचकचहा रहे। बीस रुपियाँ लेना ठाउँमे ३० रुपिया लैलेहल। तीन जहनके नब्बे रुपिया लेही छोरल। बिचारा आशाराम कोहि्रयाहे नब्बे रुपिया डेहे परलिन्।
महाँ साँसटसे आधा घण्टा रैहके बेली पुग्ली। खुटिया पुल नाङ्के बसम्से उटर्ली। कुछ साधन नै रलक ओरसे तीनजे डग्गर भर नेङ्टी गजलके शेर अइटी रहल।
डग्रेम एकठो मैनयासे पुछ्लु–महाराज भादा गाउँ कटरा दुर बा? कट्रा ट्याम लागी? हजुर जाइल करी अभिन डेढ घण्टा लागजाई। हम्रेफें का कम हाली पुगक् मारे गेरा नम्बरके गारीहे एकफाले तीन गेर लगैली। टबफेंन गजल ओ मुक्तकके शेर ढेबरम्से अइटी रहे।
दिन भरिक भुखाइसल जीउ पेटम् डुकरी, मुस टे कत्रा कुडिंट कत्रा नै। इन्जिनके पावर ढिरे–ढिरे घटे लागल। बेट्रीफे ढिरे–ढिरे लो हुइ लागल। उर्मा गाउँमे एकथो बुरह्वासे पुछली बुदुु भादा गाउँ पुग्ना कत्रा ट्याम लागी? जाइल करो नटियौ अभिन बहुत दूर बा। ठनिक बेरे लागी। बेरी खाई ठिक्के
पुग्बो।
सिहरल जीउ नेंगट–नेंगट डट्कर गैल रही। भुखफें मन्के लागगैल रहे। साँझ फें होगैल रहे। बनवामे नेंगे बेर ठनिक डर लागे। कहुँ लफङ्गा लर्का आके ठठाइँट ना कैहके सोंचटी रही कि ठिक्के पर सामरचौरा गाउँक गणेश चौधरी पुगगैंला। हुँकारसँगे एक जाने संघरिया फेंन रहिंट। आब टे डर फें हेराइलहस लागल। मनै पाँच जाने, साइकिल डुठो। बैठ्के जैना सम्भव नै हुइल। धेर जाने होगैली कैहके हहरैटी चलागैली।
भादा गाउँ पुगट–पुगट झोल्पट अन्धार हुइ लागल रहे। हम्रे सक्कुजे कार्यक्रम हुइना ठाउँ ओर लग्ली। एक घचिक रैहके कार्यक्रमके स्टेजमे पुग्ली। वहाँ सर्वहारी डाडु, सुशील, छविलाल कोपिला, सोम डेमनडौरा, ठाकुर अकेला, परशुनारायण चौधरी, भादा गाउँक लक्ष्मी नारायण ओ छिट्कलके सक्कु संघरियन अस्रा लागके, आँख मिच्छाके बैठल रहिंट।
सक्कुहुनसे रामरमैया फेंन हुइल। बिहानके हुइना कार्यक्रमके सेडुलके बारेम फे निर्णय हुइल। बिहानके हुइना साहित्यिक कार्यक्रमके लाग जम्मा जिम्मेवारी छिट्कल थारु साहित्यिक समाजहे डेगिल। यी सालके भादा होमस्टे महोत्सव २०७० हे कुछ बौद्धिक बनाके एकठो स्मारिका निकर्ना बात फेंन हुइल।
अत्रा बात करट–करट बेरीजुन होगैल रहे। आयोजक लोगनके निर्देशन अन्सार सक्कु जे बेरी खैना स्थान ओर लग्ली। नेपाल देशमे पानी छलाभल रलेसे फेंन लोडसेडिङ्के कारण अन्धारकुपमे चुमचाम बेरी खाई परल। ओत्रा भारी कार्यक्रम ढारके फें जेनेटरके सुविधा नै। बेरीफे झारन झुरुन किल बचल रहे काहुन। टठियामेटे डुठो खोंटर ओ मुरैक् काठा किल। दालओल रबै नै करिन् काहुन कपुवक टे बाते छोरो। वश अन्धारम् टोंटा टानटान भात सट्काई परल। मुले जिन्गिम् पहिलबार मुरैक काठासँग करिया खोंटर चबागैल। तेजबहादुर कहलाँ–अरे सर कैसिक पेट भरैना हो? मै कहलुँ साहित्यिक यात्रा अस्ते हो, हलि खाई सबजे सेक दरलाँ नैटे लाजे लागी। हडरबडर पग्राठी मरटी बम्माओर चल्ली हाँठ ढोइ।
बेरीओरी खाखुके चल्ली सुट्ना ठाउँओर। सक्कु पहुनन्के लाग सुट्ना व्यवस्था होमस्टे संचालन हुइल घरम् किल रहे। चार–चार जहनके फाँट रहे। आउरजे खै कैसिक–कैसिक सुट्लाँ। हमार पाँच जनहने कोपिला, सोम, परशुनारायण, ठाकुर ओ मोर एक घर फाँट रहे। सुटे गैलीटे सक्कु घरक मनै सुटगैल रहिँट। ऊ घरके एकथो, भौजी किल जागल रहिँट। ऊ भौजी साइट हमारे अस्रम् बैठल जैसिन
लागल।
सक्कु जे पस्गा गिनोर बरा घच्चिक आगी टप्ली। सोम अपन बिटल लस्गर ब‰गर बरा मिठ–मिठ बात बत्वइलाँ। ऊ घरक भौजी फेंन बात बत्वइनामे कम नै रही राम्मोराम। सबसे छोट ठाकुर अकेला ठहरलाँ। हुकाँर लाग भादासे दुलहनियाँ बनैना बात फेंन कैली। मने ठाकुर हाँ कहटी–कहटी जने कैसिक मन घुमालेलाँ बाते नै गाँठी लागल। बसम् बैठ्लक कोपिला हे सिहरा मेटावन खोजे हस कर्लाँ लेकिन आउर संघरियन चाल ने कैलाँ। मने–मने सोंचु मोर फे टोंटा घुटघुटाइस् करटा। गफेसफे रात गेरा बजगील रहे। हाँठगोर, ढोढाके टुटु उटु कैकुके कोन्टीओर लग्ली।
पठरी लागल रहे चार जहनके कहाँ हमे्र पाँच जाने। मने हम्रे ठाकुरसे एक्के गुड्रीक भित्तर कुरभुरैना हुइल। सबजे घँरघँर नाक बोलाबोला सुटिंट लेकिन यी जीउक् अभिनसम् एक्को निंन परल नै रहिस। एकटे छुटीमुटी गुड्री ओम्हे परगैली डुजने। संघरियाहे जार लगहीन् कैहके आधा पिठ निकरले डुनु गोरा कुर्की मरले ठरठराउँ। पुस महिनक जार ना कहे। रातभर कबु छाती निकारे परे टे कबु पिठ। कबु गोरा निकारे परे टे कबु मुरी। सम्मस रात जारे मुए परल। आझ घरी अत्रा जार मै कहु नै मुअल रहुँ। जिन्गीम् सबसे जेडा जार लागल महशुस हुइल भादामे।
मुले मै किल कहाँ बिचारा ठाकुर अकेलाफेंन जारे मुला कटि। बिहान चार बजे ओर सबके निंन खुलगिलिन्। पठरीमे गुड्रीक भित्तर गुनमुन–गुनमुन करट करट बिहान होगैल। पाँचजाने सल्लाह करली ओहे घर कल्वा खैना। कोपिला ठाकुरहे अर्हैलाँ कल्वा बनाइक कहे। ठाकुर डौरटी गैलाँ भन्सरीया भौजीहे कल्वा बनाइक कहलाँ।
हाँठमुह ढोइली। टट्टी ओट्टी कैली। एकघचिक रहैके चाय फेंन आइल। चाय पिके एक घचिक गाउँओर नेंगेगैली। गाउँक बारेम सोधपुछ कैली। ऊ गाउँमे जम्मा घरधुरी संख्या १९८ रहल पत्ता
चलल्। एकघचिक घुमघामके बसेरा बैठल घरओर लग्ली। तबसम कल्वा तयार होगैल रहे। अँगनम् खटियामे बैठके घाम टप्टी रही ठिक्केपर भन्सरिया भौजी खाना खाईक भन्साओर जैना हाँक परली।
हाँठ ढोढाके भन्सक भित्तर पैठली। बाँसक टावाँ, घरैया मुर्गीक बुट्टी, आलुक टिना, उर्दक दाल भात मन्के खागिल। ओम्हे मुरैक कचौरा कोपिला टे तीन अघाला एक परोसन मन्के डबैलाँ। मने घोंघी ओ महुवाँरी भर सुँघे नै मिलल। खाखुके सेक्ली। एक घचिक रैहके बिल आइल हजार रुपियाँ। भाग लगैली मनै परट दु/दु सौ टिरली। झोला झम्पट लेली ओ लग्ली कार्यक्रम हुइना ठाउँ ओर।
दश बजेसे हुइना कार्यक्रम बाह्र बज गिल। टबफेंन कार्यक्रम शुरु नै हुइल रहे। बलतल १ बजल टे कार्यक्रम शुरु हुइल। प्रेम चौधरी उद्घोषक जी औपचारिक रुपमे कार्यक्रमहे ठन्चे आगे बह्रैलाँ। जहाँ सभापति–लक्ष्मी नारायण चौधरी, बर्का पहुना कृष्णराज सर्वहारी आउर पहुनन् सुशील चौधरी, दिलबहादुर चौधरी, छविलाल कोपिला, सोम डेमनडौरा, परशुनारायण कुसुम्हिया, ठाकुर अकेला लगायत तमान जहन्के सहभागीले मञ्च खचाखच भरल रहे।
फिरभी सबके सेडुल अन्सार कार्यक्रम ढिरे–ढिरे खर्बराइ लागल। लोक साहित्य वाचन हुइना ठाउँमे डिस्को भाँगरा चले लागल। बौद्धिक बनैना कार्यक्रम कहलमेफे अज्कलिक ट्यापे डान्स जम्के लागल। आब पला आई आब पाला आई, कहटी–कहटी दिन बुरगैल लेकिन, साहित्यकार लोगनके डायरीक पन्ना हाँठेक–हाँठेम रैहगैल। दूर–दूरसे आइल पहुना अस्रा लागके बैठल बैठलेक् बैठले रैहगैलाँ। भादा गाउँक, महोत्सवके आवाज केन्द्रसम पुग्ना मौका चुकगैल।
आयोजक लोग सटरपटर करे लग्लाँ। छिट्कलके संघरियन भोहर मुह लेले रातीरात घरे घुमे परलीन्। बाहेर जिल्लासे आइल पहुनन् बेवारीसे हुई परलीन्। भुँखे मुए परलिन्। सर्वहारी डाडु रातीरात धनगढी आइ परलीन्। बपरा मोबाइल हेरवा–हेरवा कार्यक्रममे हाजिर टे हुइलाँ लेकिन कविता वाचन करे नै पाके गजब पश्टैलाँ।
यी पंक्तिकारहे फें भादक बारेम लिखल गजल वाचन करे नै मिल्लिस। टबमारे ठाकुर कहठाँ– आझटक सबसे झुर कार्यक्रम यहैं भादा लागल। नौ महिना पहिले लक्ष्मीनारायण जी छुट्की पलियामे बाचा कैले रहिंट कि छिट्कलके अप्खी हुइना कार्यक्रम भादामे हुई। भादामे कार्यक्रम टे हुइल लेकिन बिना मटलबिक। ढेर जहनके मन रुइलिन्, चित्त दुःखलिन्। डोसर बिहान सबके फेसबुकमे कमेन्ट आइल ‘भादा बरा दूर, कार्यक्रम भर झूर’।
बसौटी–७ डख्खिन् टेंह्री, कैलाली
साभारः १ फागुन, गोरखापत्र