कौशलेन्द्रकुमार- पश्छिउँ ओर लक्ष्मण थारु, योगेन्द्र चौधरी ओ पुरुबओर नरेन्द्रकुमार चौधरी, गोविन्द चौधरी, हरिबाबु चौधरी लगायत टमान थारु हस्ती मधेशी जनअधिकार फोरम (लोकतान्त्रिक) म प्रवेश करल पाछे यकर अवस्था बहुट बल्गर हुइहिस कना सोंच गैल रहे, मने मधेशी दलमे सब्से आगे हुइलो पर यी सोंचल अनुसार मत नाने नैसेकल। बहुट ठाउँमे यी चौठा आइल बा। थरुहट आन्दोलनके अगुवाइ करुइया लक्ष्मण थारू कैलाली जिल्ला क्षेत्र नं. ६ मसे प्रत्यक्षम उम्मेदवारी डेले रहिट। मने उहा ४ हजार ४ सय ७३ मत लान्के चौठा स्थानमे अइला। उ क्षेत्रम काँग्रेसके वरिष्ठ नेता शेरवहादर देउवा १६ हजार ४ सय ८९ मत आन्क विजयी हुइला। एमालेके महेश्वर पाठक ८ हजार ५ सय ६३ मत आन्क डोस्रा, एमाओवादीके लिला भण्डारी ४ हजार ७ सय ६४ मत लान्के टेसर अइली।

गोविन्द चौधरी (रौतहट) पहिले स्वतन्त्र, बादमे तमलोपासे जिटलमे अप्की फोरमसे रौतहट–५ से चौठा स्थानमे चित्त बुझाइ पर्लिन्। इहीसे पैल्हक चुनावमे राप्रपासे सबसे ढेर मत लनुइया नरेन्द्रकुमार चौधरी अप्की फोरम लोकतान्त्रिकसे सुनसरी–२ से टिस्रा स्थानमे रहे पर्लिन्। उ क्षेत्रमे कांगे्रस ओ एमाओवादीसे क्रमशः बद्रीनारायण चौधरी ओ रामकुमारी क्रमशः डुस्रा ओ चौठा अइलाँ, उहाँ एमालेसे गैरथारु जिटल। मोरङ–६ मे भक्तिनाथ माझी थारु फे फोरमसे सम्मानजनक डुस्रा स्थानमे मत लन्लाँ। सप्तरी–५ से फोरमसे छेदीलाल चौधरी टिस्रा हुइल बटाँ। फोरम लोकतान्त्रिकके पच्छिउँओर मत हेर्लेसे कञ्चनपुरके १ ओ २ मे चौठा, कैलाली २ मे चौठा, बर्दिया १ ओ २ मे चौठा, बाँके १ ओ दाङ १ मे चौठा, रुपन्देही २ ओ नवलपरासी ३ मे चौठा स्थान पैले बा। डोसर चुनावमे यी उम्मेद्वार जितके लग्गे अइही कना अश्रा करेसेक्जाइठ।
थरुहट तराई पार्टी नेपाल कहुँसे प्रत्यक्षमे जिटे नैसेकल। केन्द्रीय अध्यक्ष भानुराम डगौंरा थारू कैलाली ३ से ७ हजार ९ सय ७० मत लान्के टेसर हुइल रहिट। पार्टीक् यी सब्से ढेर मत हुइस। कैलालीक् आउर क्षेत्रसे फे यकर मजा मत नै अइलिस, उहाँक ५ नं क्षेत्रसे माधव चौधरी चौठा अइलाँ। कञ्चनपुर ३ से फे यकर उम्मद्वार चौठा अइलाँ। बर्दिया ४ से पार्टीक सचिव मिनराज चौधरी ३३८७ मत लानके चौठा अइलाँ। बाँके, दाङके कौनो क्षेत्रसे यी चौठा स्थान लाने नै सेकल। दाङ ५ से टे झन यी सब्से पुछारमे रहल। कपिलबस्तु १ से जवाहरलाल चौधरी ४७१९ मत लानके चौठा अइलाँ। नवलपरासीसे देवानन्द फौजदार ५६२१ मत लानके टिस्रा हुइलाँ। थरुहट तराई पार्टी नेपाल समानुपातिकमे ६२ हजार ५ सय २६ मत लानके २ सीट सुरक्षित कर्ले बा। वरिष्ठ नेता गोपाल दहितके सभासद पक्का बटिन कलेसे डोसरके लग बैठक चल्टी बटिन्।
रुक्मिणी चौधरी अध्यक्ष रहल संघीय लोकतान्त्रिक राष्ट्रिय मञ्च (थरुहट) प्रत्यक्षमे कहुँ रंग डेखाइ नैसेकल। चितवनके १ मे टिकेन्द्र चौधरी १९२३ मत ओ ५ मे ललित चौधरी १७४६ मत नानके क्रमशः चौठा ओ पाँचौ हुइलाँ। फिर भी समानुपातिकमे २१ हजार १ सय २८ मत लानके एक सिट सुरक्षित कर्ले बा। रुक्मिणी आपन सभासदके पद पक्का कर्ले बटी।
साभारः २१ मंसिर, गोरखापत्र