सन्तोष दहित, दाङ- नोभेम्वर २५ अर्थात गैल अठ्वार सोमारक दिन्वासे सुरु कैगिलक लैंगिक महिला हिसाविरुद्धके १६ दिवसीय अभियान कार्यक्रम अन्गर्त दाङम फे मेरमेह्रीक कार्यक्रम कैख लैंगिक महिला हिंसाविरुद्ध अभियान जारी बा।
लैंगिक महिलाहिंसाह अन्त्य करकलाग दाङके सरकारी तथा गैरसरकारी कार्यालयके सहकार्ययम गोष्ठी, अन्तरक्रिया, वैठक, कचेहरी, सडक नाटक, मोटरसाइकील र्‍याली, सन्देशमुलक पम्पलेट, पर्चा वीतरण लगायत कार्यक्रम निरन्तर हुइटी बा। नाभेेम्वर २५ तारिखसे डिसेम्वर १० तारिख सम्म हुइना यी अभियान कार्यक्रम अन्तर्गत शुकक दिन्वा महिला मानवअधिकार रक्षकके अगुवाइमा दाङके सदरमुकाम घोराहीम दाङके महिला मानवअधिकार रक्षकहुक्र मोटरसाइकील र्‍याली निकर्ल।
घोराहीके सहिदचोकसे शुरु हुइलक मोटरसाइकील र्‍याली ट्राफिक चोक, नयाँ बजार, मिलन चोक, दामोदर चोक, जिल्ला प्रशासन कार्यालय हुइटी पुनः सहिदचोकम आख कोणसभाम परिणत हुइलरह। कोणसभाह सम्बोधन कर्टी महिला मानवअधिकार रक्षक राष्ट्रिय सञ्जालके केन्द्रिय सदस्य लक्ष्मी आर्चाय महिला मानवअधिकार रक्षकहुकनके कामके मान्यता, पहिचान, सुरक्षा ओ महिलाअधिकार स्थापनाके मुद्धाह लेक महिला मानवअधिकार रक्षकहुकनके अभियान देशव्यापीरुपम सञ्चालन हुइटी रलक जानकारी करैली। र्‍यालीपाछ महिला मानवअधिकार रक्षकहुक्र अभियानक गतिवीधि जिल्लाम अभियानके अवस्था प्रभावकारीता ओ आगामी कार्ययोजनाबारेम अन्तक्रिया कैगिलरह।
महिला मानवअधिकार रक्षक सञ्जाल दाङके अध्यक्ष लालिका पोखे्रलके अध्यक्षताम हुइलक कार्यक्रमम हिंसा प्रभावित महिलाके न्यायम पहुँच स्थापित कर्ना बहुट चुनौटी बा, कानुनी : रुपम सम्वोधन हुइलक अधिकारके विषय व्यवहारम लागु हुइ निस्याकल, कानुनी साक्षरताके अभाम महिलाहुकन थप सास्ती भ्वाग पर्ना लागायतके बात उठलरह। कार्यक्रमम जिल्लाके लमही, तुलसीपुर ओ घोराहीके महिलाहुकन्क सहभागितारह।
ओस्टक महिलाहिंसाह अन्त्य करकलाग आदिवासी जनजातिल महिलाहुक्रफे जागरुक होक लागपर्ना शनिच्रक दिन्वा हुइलक एक कचेहरी कार्यक्रमम बोल्ना सहभागिहुक्र जोडदेरख्लह। परम्परागत प्रथाजनित संस्था आदिवासी जनजाती महिलाहुकने सशक्तिकरण परियोजना अन्तर्गत महिला हिंसा ओ आदिवासी जनजातिके सवालके विषयक कचेहरी कार्यक्रमम बोल्ना सहभागिहुक्र असिन बात बटोइलक हुइट। राष्ट्रिय आदिवासी जनजाति महिला महासंघ दांङके अध्यक्ष सुघरी चौधरीके अध्यक्षताम हुइलक कचेहरी कार्यक्रमम दाङ लगायत पश्चिम तराईके जिल्लाम थारु समुदायके महिलाहुक्र बहुट हिंसा भ्वाग पर्लक उल्लेख कर्टी असिन खालक हिंसाह बडघर, महटवा, भलमन्सा सस्थाके तरफसे सशक्तिकरण कार्यक्रम कैख हटाइ पर्ना बातम जोडदेरख्लह।
ओस्टक ‘घर शान्ती नै विश्व शान्तीके आधार, महिला हिंसाविरुद्ध शुन्य सहनशीलत कायम करी’ कना नारा लेक महिला हिंसा विरुद्ध सडक नाटक लालमटिया, गढवा, लमही, तुलसीपुर नारायणपुरम अट्वारक दिन्वा महिला तथा बालबालिका कार्यालय ओ जिल्ला संयोजन समितिके आयोजनाम तथा कमलरी नाट्य समुहके सहआयोजनाम सडक नाटक पर्दशन कैगिलक महिला तथा बालबालिका कार्यालयके उपसचिव प्रभा श्रेष्ठ वली जानकारी देली। ओसहक वलीके अनुसार लमही, तुलसीपुर गढवाम महिला हिसा विरुद्ध र्‍यालीफे निकर्लक लौवअग्रसान साप्ताहिकह जानकारी करैली।
ओसहक लैंगिक महिलाहिंसा विरुद्ध १६ दिने अभियान कार्यक्रम अन्तर्गत सोमारक दिन्वा मानव वेचविखन तथा ओसारपसार विरुद्ध सरोकारवाला निकायके विचम अन्तरक्रिया कार्यक्रम सम्पन्न होरहल। निमत्त प्रमुख जिल्ला अधिकारी पुण्य प्रसाद लुइटेलके अध्यक्षताम सम्पन्न हुइलक कार्यक्रमम जिल्लाम मानव बेचविखनके उच्च जोखिम रलसेफे पीडितहुक्र न्याय के लाग सम्वन्धीत निकायम निअैलब बक्ताहरु जोडदेरख्लह। कार्यक्रम अधिकार महिला तथा बालबालिका कार्यालके उपसचिव प्रभा श्रेष्ठ वली, बालअधिकृत रश्मी पाण्डेय, जिल्ला जनस्वास्थ्य कार्यालयके प्रमुख केशवराज पाण्डित, जिल्ला शिक्षा अधिकारी जीतवहादुर शाह, जिल्ला प्रहरी दाङके एसपी शरद कुमार खत्री, महिला मानवअधिकार रक्षक राष्ट्रिय सञ्जालके केन्द्रिय सदस्य लक्ष्मी आचार्य, मानवअधिकारकर्मी विनोद केसी, नेपाल पत्रकार महासंघ दाङ शाखाके सचिव सविन प्रियाशन, पत्रकार बसुन्धरा गौतम लगायत बोल्रख्लह। कलसे कार्यक्रमम मानव वेचविखन तथा ओसार पसार सम्वन्धी प्रतिवेदन ओरेक दाङके कार्यक्रम संयोजक सरिता भुसाल प्रस्तुत कैरख्लही।