बिराटनगरका ब्यापारी राठी र शिव सेना नेपालका अध्यक्षको शव फेला

विराटनगर०- अहपरणमा परेको २३ दिनपछि विराटनगरका उद्योगी गंगाविशन राठी र शिव सेना नेपालका अध्यक्ष चन्द्र चुडालको शव भारतको पश्चिम बंगाल राज्यस्थित टिस्टा खोलामा फेला परेको छ। अपहरणमा संलग्नको बयानका आधारमा अनुसन्धान गर्दा राठी र चुडालको शव भेटिएको उच्च प्रहरी स्रोतले जनाएको छ। अपहरित राठीलाई छुटाउन उनको परिवारले ५० लाख रुपियाँ फिरौतिसमेत बुझाइसकेका थिए।

अपहरणमा संलग्न भएको अभियोगमा नेपाल र भारतको सुरक्षाकर्मीको संयुक्त अपरेसनमा भारतीय नागरिक सुरेन्द्रकुमार मिश्र र अभिजीत वासु पश्चिम बंगालको बोलपुरबाट पक्राउ परेका थिए। उनीहरुकै बयानको आधारमा प्रहरीले शव फेला पारेको हो। नेपाल र भारतको संयुक्त प्रहरी टोली अहिले शव भेटिएको स्थानमा रहेको छ। व्यापारिक कामको सिलसिलामा काकडभिट्टाको नाका हुँदै भारतको सिलगुढी पुगेका उद्योगी राठी पुस २७ गतेबाट बेपत्ता भएका थिए। उनी हराएको दोस्रो दिनबाटै उनकै मोबाइल प्रयोग गरेर उनको परिवारलाई फिरौती माग्ने फोन आएपछि उनी अपहरणमा परेको खुलेको थियो।

राठी अपहरणमा परेको खुले पनि उनको परिवारले प्रहरीमा औपचारिक जानकारी गराएको थिएन। माघ ५ गतेमात्रै परिवारले विराटनगरमा राठी हराएकाले खोजतलास गरिपाऊँ भन्दै निवेदन दिएको थियो। निवेदन पर्नुअघिसम्म राठीको मोबाइल नम्बर काठमाडौंमा सक्रिय देखिएको थियो। फिरौती माग्न प्रयोग गरिएको नम्बरको लोकेसन काठमाडौंको सुन्धारा र कलंकी क्षेत्रमा देखिएको थियो। राठी हराएको समाचार सार्वजनिक भएपछि मोबाइल स्विच आफ भएको थियो। त्यसपछि अपहरणकारीले भारतबाट उनको परिवारसँग राठीको मुक्तिका लागि फिरौती बार्गेनिङ गरेको थियो।

प्रारम्भिक अनुसन्धानमा भारतीय र नेपाली अपराधीको संयुक्त योजनामा राठीको अपहरण भएको आशंका गरिएको थियो। भारतीय क्षेत्रमा अपहरणमा पर्नु र काठमाडौंबाट रकम माग्ने घटनाक्रमले अनुसनधानरत प्रहरी राठी अपहरणमा भारतीय र नेपाली अपराधी संलग्न भएको निष्कर्षमा पुगेको थियो। फिरौती लिन आउँदा पक्राउ परेका भारतीयबाट राठी अपहरणमा शिव सेना नेपालका अध्यक्ष भनिने चन्द्र चुडालसमेत मुछिएका थिए। उनीहरुले चुडालको योजनाअनुसार राठीको अपहरण भएको दाबी गरेका छन्। अरुण सुवेदीको नेतृत्वमा रहेको शिव सेनाबाट फुटेर चुडालले छुट्टै संगठन खोलेका थिए। स्रोतका अनुसार चुडाल र राठी भारतसँगै गएका थिए। त्यसयता चुडाल पनि बेपत्ता थिए। अहिले राठीसँगै चुडालको पनि शव भेटिएको हो।

Leave a Reply

Your email address will not be published.