भियतनामको होची मिन्हमा हुने २३औँ एसियाली तेक्वान्दो, पाँचौँ एसियाली पुम्से तेक्वान्दो र चौथो एसियाली पारा तेक्वान्दो च्याम्पियनसिपमा सहभागी हुन १० खेलाडीसहित १३ सदस्यीय नेपाली टोलीलाई आइतबार बिदाइ गरिएको छ । टोलीलाई राष्ट्रिय खेलकुद परिषद् (राखेप) का उपाध्यक्ष लामा टेन्डी शेर्पाले बिदाइ गरे ।
पुरुषको ५४ केजीमुनि मनोज मल्ल र ७४ केजीमुनि दुर्गाबहादुर थापा तथा महिला ४९ केजीमुनि कल्पना चौधरी र ५७ केजीमुनि सीता तामाङले २३औँ संस्करणमा प्रतिस्पर्धा गर्नेछन् । व्यक्तिगत पुम्सेको ३० वर्षमुनि पुरुषमा कमल श्रेष्ठ र महिलामा पार्वती गुरुङले सहभागिता जनाउनेछन् ।
पारातर्फ पुरुष ५८ केजीमुनि गोविन्द थापा र ६१ केजीमुनि रामबहादुर अधिकारी तथा महिला ५८ केजीमुनि सीता भण्डारी र ५८ केजीमाथि पलेशा गोवर्धनले नेपालको तर्फबाट चुनौती प्रस्तुत गर्नेछन् । प्रशिक्षकमा टार्जन सुब्बा र प्रकाशमान राजभण्डारी तथा निर्णायकमा नवीनकुमार श्रेष्ठ रहेका छन् ।
पारा खेलाडी, २ प्रशिक्षक र निर्णायक आइतबारै भियतनाम प्रस्थान गरिसकेका छन् । बाँकी टोली आगामी ८ र ९ जेठमा जाने कार्यक्रम रहेको नेपाल तेक्वान्दो संघले जनाएको छ । प्रतियोगिता १० देखि १४ जेठसम्म हुनेछ ।