कृष्णराज सर्वहारी।
डोसर चरणके प्रदेश ओ प्रतिनिधि सभाके चुनाव फेन आब् ढेर डिन नैहो । इहे अघन २१ गटे तराई थरुहट क्षेत्रमे चुनाव हुइ जाइटा । खासकैके प्रतिनिधि सभाके चुनावमे प्रत्यक्ष उमेदवार थारु नेताः के कट्रा पानीम् बा ? यकर संक्षिप्त विस्लेसन कर्ना यि लेखके मकसद हो ।
सुनसरी ३ मे नेपाल लोकतान्त्रिक फोरम पार्टीहे कांग्रेसमे विलय कराइल विजयकुमार गच्छदार ओ एमालेके भगवती चौधरीबीच कडा टक्कर बा । गइल स्थानीय चुनावमे प्रमुख आधार क्षेत्र दुहवी नगरपालिकाके मेयरमे नेपाल लोकतान्त्रिक फोरम पार्टीसे वेद गच्छदार जिटल बटाँ । उहेसे फोरम ओ कांग्रेसके सम्मिलन से गच्छदार आपनहे हेभिवेट उमेदवार मन्ले बटाँ । मने भगवती चौधरी फेन कम नैहुइ । कारन गइल संविधानसभाके चुनावमे गच्छदारहे केवल साढे ३ सयके मतान्तरसे हटल रहि उहाँ । गच्छदार पटक पटक जिटके गैलोपर जिल्लाके हकमे खास विकास नैकरल ओर्से अप्कि जनता आपनहे जिटैनामे भगवती ढुक्क बटि । मने जि जिटे, एक थारु जनप्रतिनिधि पक्के अइहि ।
ओहोर दाङदेउखर क्षेत्र १ मे वाम गठबन्धनसे एमाले दाङदेउखरके जिल्ला इन्चार्ज मेटमणि चौधरी ओ निवर्तमान सांसद सुशीला चौधरी लरल बटाँ । सुशीला सांसद रलोपर बहुट कम जनतनके घरदैलोमे नेंगल आरोप हुँकार उपर बटिन् । ओहोर लम्मा राजनीतिक उडान रलो पर मेटमणिक् यि पहिला चुनाव हुइन् । हुँखिन फेन देउखरसे ढेर टेम दाङ उपत्यकामे डेहल कारन जनता किहि भोट डेना अलमलमे बटाँ । मने वाम गठबन्धनके भोट ढेर रहल कारन अपन जित सुनिश्चित रहल मेटमणि बटैठाँ । मने जि जिटे, यहाँ फेन एक थारु जनप्रतिनिधि पक्के अइहि ।
बर्दिया क्षेत्र २ मे भूमिसुधार मन्त्री गोपाल दहित ओ विना विभागीय मन्त्री सन्तकुमार चौधरीबीच टक्कर बा । दहित थरुहट आन्दोलनहे ढोखा डेके मन्त्री खाइक लग किल कांग्रेसमे छिरल आरोप विपक्षीके बा । उहाँ इहिसे पहिले सांसदमे राप्रपासे लरके हारसेकल बटाँ । संसदमे आवाज बुलन्द कर्ना सवालमे दहित सब्से बेहतर उमेदवार हुइट । मने खै भाग्य हुँखिन साठ डेठिन कि नै ? सन्तकुमार इहिसे पहिले डुइचो जितके ह्याट्रिक कर्ना ढुनमे बटाँ । मने जि जिटे, यहाँ फेन एक थारु जनप्रतिनिधि पक्के अइहि ।

ओहोर कैलाली क्षेत्र ३ मे नेपाल लोकतान्त्रिक फोरम पार्टीसे कांग्रेसमे आइल रामजनम चौधरी ओ वाम गठबन्धनके गौरीशंकर चौधरीबीच कडा टक्कर बा । इहे क्षेत्रमे लोकतान्त्रिक फोरम पार्टीके केन्द्रिय अध्यक्ष भानुराम चौधरी संघीय समाजवादी फोरमके मशाल चिन्ह लेके उठल बटाँ । मने उ डुइ जनहनले कमजोर उमेदवार गन्जैठाँ । रामजनमहे थरुहट आन्दोलन भँजाके पटक पटक मन्त्री बन्के फेन टीकापुर आन्दोलनके कैदीन् नैछुटाइल आरोप बा । ओहोर गौरीशंकर माओवादी सरकारमे कृषि मन्त्री बनके ढेर काम करल ओर्से जनता फेन सेवा कर्ना मौक डिहि कना अस्रामे बटाँ । मने जि जिटे, यहाँ फेन एक थारु जनप्रतिनिधि पक्के अइहि ।
यि ४ क्षेत्रबाहेक बाँकि क्षेत्रमे थारु जनप्रतिनिधि एक डोसर बीच प्रतिस्पर्धा नैरहल ओर्से थारु जनप्रतिनिधि जो अइहि कना सेवर नैहो । बारा १ मे कांग्रेसके उमाकान्त चौधरी वामगठबन्धनके अच्युत मैनालीसे भिरल बटाँ । बारा क्षेत्र ४ थारुकेन्द्रित क्षेत्र हुइलओर्से उहाँ वामगठबन्धनके देवनारायण चौधरी जट्रा सुरक्षित बटाँ, ओट्रे असुरक्षाके घन्टी उमाकान्तके उपर बा । सप्तरी ४ मे वर्तमान खेलकुद राज्यमन्त्री तेजुलाल चौधरी अपन जित सुनिश्चित रहल दावी कर्ले बटाँ । मने उ क्षेत्रमे मुसलमान उमेदवार फेन कमजोर नैहुइट । कांग्रेससे राजिनामा डेसेकल मने स्विकृत नैहुइल पर्साके सुरेन्द्र चौधरी कांग्रेससे टिकट टे भेटैले बटाँ । मने जित्ना आश्वास्त नैहुइट ।
टीकापुर आन्दोलनके कैदीन् नैछुटल अवस्थामे अब्बे राजपासे कैलाली ५ से लक्ष्मण थारु उम्मेदवार बटाँ । उहाँ कांग्रेसके आरजु देउवा ओ वामगठबन्धनके नारदमुनि राना थारुबीच टक्कर बा । मूलधारके मिडियामे लक्ष्मणके नाउँ गुमनाम बा । जेल भिट्टर रहिके चुनाव लरना साँसट बटिन् । आपन उमेदवारीहे आन्दोलनके रुप मन्ले बटाँ उहाँ । ओहोर टीकापुर आन्दोलनके आरोपमे भागे परना बाध्यता रहल रेशम चौधरी राजपासे जो कैलाली १ से उम्मेदवार बटाँ । उहे क्षेत्रमे उहाँक् बाबा लालबीर चौधरी प्रदेश सभासे उम्मेदवार रहल ओर्से उहाँहे फेन चुनाव जिट्ना कर्रा बटिन् । मने जनता हुँकार भिडियो फुटेज डेखाके ओट मंग्टि बटिन् । जे अपन बाबाहे टे सम्झाइ नैसेकल टे जनतन कसिक सम्झाइ ? उहाँक् उपर इहे परस्न टेर्सल बा । उहे एमाले, कांग्रेसलोग रेशमके चुनावी भिडियो फुटेजहे फेन डेखे नै सेक्के रोक लगैटि बटाँ । इहिसे भारि विडम्वना आउर का हुइ सेकि ?
थरुहट तराई पार्टी नेपालसे नयाँ शक्ति छिरके एमालेके समानुपातिकमे सिट सुरक्षित करल गंगा सत्गौवा थारुके का बाट करे । जे टे केपी ओलीहे थारुन्के सब्से भारि बिरोढि कहिके राटोडिन गरियाके नैठकल, उहे आज एमालेके सब्से भारि प्रवक्ता बनल बा । थारु नेतालोग थरुहट मुद्धा छोरके खाली कुर्सि बचाइक लग कसिक नैतिकता हेराइल राजनिति कर्टि बटाँ । सांसद बन्ना लोभमे गंगाके एमाले प्रवेससे पटा चलठ ।
थ्रेसहोल्डके कारन बरा बरा दल मर्ज हुइटि रहल बेला संघीय लोकतान्त्रिक राष्ट्रिय मञ्च (थरुहट)से उमेदवारी डेहल रुक्मिणी चौधरी राजनीतिक आत्महत्या कर्ना अभियानमे बटि । हुँकार कोनो उमेदवार हजार भोट फे नैकटैहि । राजकुमार लेखी प्रदेश सभामे राजपासे लरल बटाँ । मने जिटे सेक्ना कोनो आधार नैहुइन् । प्रदेश सभामे उमेदवार रहल राज्यमन्त्री रहल डिल्लीबहादुर चौधरी आपनहे ५ नम्बर प्रदेशके मुख्यमंत्रीके दावेदर मन्लेसे फेन दाङमे समग्रमे कांग्रेस कमजोर बा । टीकापुरमे अपन घर जरनासे बँचाइ नैसेकल राज्यमन्त्री जनकराज चौधरीके प्रदेश सभामे उमेदवारीके पलरा पलरा गरु हुइ सेकठ, मने थारु जातीय आन्दोलन छोरके चुमाइल बेला गैरथारु एकगँठ होके औरे म्याच फिक्सिंग करे सेक्ना का बेर ?
कैलालीमे थरुहट आन्दोलनके अगुवाइ करल माधव चौधरीहस मनै स्वतन्त्र उमेदवार चंगा चुनाव चिन्हके पिछे पिछे डौरल उदाहरन काफि बा कि आब् थरुहट आन्दोलन उठ्ना मुस्किल बा, ओ थारुन्के राजनीति पहिलेक्ले असुरक्षित हुइल बा । चंगा टे हम्रे उराइटि मने, लट्टाइ औरे जन्हनके हाँठेम् बा । असिनमे थरुहटके चंगा कसिक उडान भरे सेकि ? समानुपातिकमे कुछ् थारुन् बरा दलवाले नाने सेक्ठाँ, जे थारुन्के आवाज नैउठाके ओइनके झोला किल बोके ओ उल्टे थारु मुद्दाके बिरोध करे ।
सब्से अहम् बाट का रहे कि जसिक महन्त ठाकुरके अगुवाइमे राजपा जुटल या उपेन्द्र यादव संघीय समाजवादी फोरमहे उचाइमे पुगाइल ओ आपनहे मधेसकेन्द्रित पार्टीके रुपमे चिन्हैलाँ । ओस्टक नेपाल लोकतान्त्रिक फोरमके बिया जोगाके थरुहट पहिचानके पार्टी बचाइ पर्ना रहे । नेपाल लोकतान्त्रिक फोरमके उपाध्यक्ष भानुराम चौधरी पार्टी जोगैना कहिके बाचा फेन कर्ले रहिट । मने उ संघीय समाजवादी फोरमके मशाल बारे डँटल बटाँ । हर डेके हरवाहि लग्ना कहकुट पुर्खा ओस्टे नैबनाइल हुइहि । अट्रा बाट भर सेवर बा कि अप्कि थारु जनप्रतिनिधिके संख्या जरुर घटि ।