थारु भाषाको संरक्षण र सम्बर्द्धनमा पत्रपत्रिकाको भूमिकाबारे राजधानीमा बुद्धिजीबी र पत्रकारबीच छलफल भएको छ। इजोत मासिक पत्रिकाले आयोजना गरेको अन्तर्क्रिया कार्यक्रममा थारु अगुवाहरुले थारु भाषा साहित्य र मानकताबारे गहन छलफल गरेका थिए।
कार्यक्रममा लेखक तथा साहित्यकार कृष्णराज सर्वहारीले कार्यपत्र प्रस्तुत गर्दै नेपालमा थारु भाषाका पत्रपत्रिकाको नियमित प्रकाशन हुन नसकेको बताएका थिए। उनले थारु भाषाको गोचालीदेखि हालसम्म जति पत्रिका प्रकाशन भएपनि अहिले केहीमात्र नियमत भएको बताए।
उनले थारु समुदायमा लेखकको अभाव र उचित लगानीको अभावले पत्रिकाहरु नियमित हुन नसकेको उल्लेख गरे। थारु भाषा साहित्यको संरक्षण गर्ने संस्था र अगुवाहरु पनि यस सबालमा चासो नदेखाएको उनको कार्यपत्रमा उल्लेख छ।
कार्यक्रममा थारु समुदायको भाषा ठाउँअनुसार फरक रहेकाले साझा भाषाका लागि थारु भाषालाई मानक रुपदिन आवश्यक रहेको सहभागी बुद्धिजीबीहरुले बताएका थिए। त्यसकालागि थारु भाषाको व्याकरण, डिस्नरीहरुको पर्याप्त प्रकाशन हुनुपर्ने उनीहरुको भारणा छ।
कार्यक्रममा साहित्यकार भुलाईप्रसाद चौधरी, सुशील चौधरी, लक्ष्मीनारायण चौधरी, लक्की चौधरी, रघुपति चौधरी, कृष्णराज सर्वहारी, चन्द्रप्रसाद चौधरीलगायतले थारु भाषा साहित्यको उन्नयनका लागि थारु साहित्यकार तथा लेखकहरुको सक्रियताको खाँचो रहेको औंल्याए।
कार्यक्रममा महेश्वर चौधरी, विद्यानन्द लेखी, हरिदेव चौधरी, गीता चौधरी, कानुनलाल चौधरी, तारा चौधरीलगायतले आफ्नो धारणा राखेका थिए।