थारु, प्रसादु।

आज अचानक चिमिक्या बाज्या बरवार ढिर हिलैती
म्वार घरक डिहुलि डव्ल पांच बरष बाद
चिमिक्कसे आखं पार्क बाबक कानम काजन का फुस्फैल,
बबा टेङ्गनार हुईल, चेहरम हल्का मुस्कान
ओ हडवडाक कल बनजाई मलिक्वा।

मै अचम्म , का जादु कैल यी चिमिक्या ,
कै बर्षक जग्गक झगरा परल म्वार बाबाहं
एक फुस्फुसाहटम मोहन्या लिहल
मै तजुव हेर्टी रहगीनु

बाबा म्वार परिचय करैल वहां मेरो छोरा हुनुहुन्छ ,
नमस्कार कर छावा मलिक्व हन ,
वि.ए. पढ्नु भाछ मेरो छोरा मलिक्वा,
म्वार फे चिन्ता बा हजुर,
छावा पह्ररक फे जागीर नै भेटाईठो,
हजुरहन कहकेल नै सेक्लक हो,
पहिलक रिसगुण माफ कैदेहो,
मै काल्ही से अप्नक प्रचारम लागजिम,
ओ फेरसे कल बनजाई मलिक्वा।

बात महिसे फे कैल चिमिक्या बाज्या,
हेरो भैया पर्हक केल कुछ नै हुई,
जागीर खाईक लाग राजनैतीक पावर चाहठ ,
बलगर पार्टि छानक ,पार्टिह पक्रक परठ,
भैया मै त्वार घरक दुःख बुझ्ल बाटु ,
त्वार दाई बाबनक दुःख मै आपन अस लागट,
मै फे त्वार लाग स्वाचतु, आपन अग्नम खेल्लक ,
म्वार महलिम नच्लक लर्का हुईस,
तुहिन नै हेरम त मै किहीं हेरम,
बरा लरम से बाट कैल ,लागल यी बाज्या
बरा ठिक मनैया हुईट , हम्र गलत ठन्ली ,

पहिल बार बाज्या आपन मनै असक लागल,
मन पगल गील ओ मै फे मुहं फोरक कनु,
बनजाई मलिक्वा।

दोसर दिनसे मै चुनाब प्रचारम दौरल,
बाबा नाट पातनक घर डौरल ,
चिन्हल जानल सक्कुन पुकारगील ,
चुनाबम चिमिक्या मलिक्व हन जिटैना
हमार लक्ष्य ,
काजे कि चिमिक्या बाज्यक जित संग म्यार
फे जित रह,जागीर जित ,
जागीर पक्का रह ,
पैसा कमैना पक्का,
उठ्ना त म्वार सग्ग फुफा फे नै उठ्लक नै हो ,
लेकिन फुफा जित्लसे सिर्फ फुकक जित रल्हीस,
हुई स्याकट थारु समुदायक जित रह ,
लेकिन ,
म्वार चिमिक्या बाज्या जित्लसे म्वार फे जित रह ,
उहमार दिलसे कल बाटु,
बनजाई मलिक्वा।

दिलसे लग्नु महिन से ध्यार जोर बाबा लग्ल,
म्वार भविष्य से ज्वारल चुनाब हुईल,
म्वार जागीर से ज्वारल मत गणना हुईल,
म्वार भाग्य बालगर रह काहुं,
चिमिक्या बाज्या जितगील,
खुस्याली हुईल म्वार घरम फे ,
चिमिक्या बाज्यक जितम ,
अर्थात म्वार जितम ,
म्वार जागीर क पक्काम,
बाबा बरा जोरसे चिल्लील ,
जय होस् मलिक्वक,
जिन्दाबाद ,

दुई चार दिन बितल
जागीरक लाग चिमिक्या बाज्या खबर कर्ल,
बरा ईमान्दार लागल ,
बाचा पुरा कर्ना हुईल,
गडगड् ज्यान जागीर ,मनमन कनु
जय होस् मलिक्वक,

चङ्गा मन लेक जागीरक लाग,
मलिक्वक घर पुग्नु ,
मलिक्वा महि जागीरक लाग पठैल ,
जाक बुझ्नु ,पिउनक जागीर,
मै वि.ए.पास छावा पिउनक जागीर,
मन मुरझुरा गैल ,
मलिक्वा जानलेल व बरा प्यारसे सम्झैल ,
भैया पहिल अस्तम त हो घुस्ना ,
एकफाल कहां मिली हाकिम जागीर,
धिरसे बहरजैव्या,

म्वार जिउ नै से नै मानल ,
मै मुह फोरदर्नु,
यी काम नै मिलल मलिक्वा ,
वि.ए.पास मै कसिक पक्रु झारु?
अत्रा का कनु ,
चिमिक्यक आंखि लाल देख्नु एकफाल,
ओ बरा रोससे कल ,
तै थारु जत्रा पह्रलसे फे,
त्वार औकात यिह हो,
त्वार जागीर यीह हो ,
यी नै कर्व्या त का पैव्या,
एक अख्रा पुछ्ल्या पहिल?
केम्न जागीर हो?
कर्व्या त कर नै त भाग हर ज्वात ,
तुन्हक आंखि कभुनै खुली,
हरबार तुन्हन छकालेहम मै ,
तुह्र कबु नै चिन्वो मनै ,

मै भुईया अन्धार देख्नु ,
चिल्लाक कनास मन लागल ,
चिमिक्या कोह्रया मुर्दावाद,
लेकिन बरा धिल होगील रह।।।

राजापुर न.पा.२,बर्दिया
हालः काठमाण्डौ