पुनिता चौधरी एक समाजसेवि एवम संघर्षसिल महिला हुईटी। उहाँहन मध्यपश्चिम क्षेत्रम निचिन्ना मनै कम हुइही। गंगापरस्पुर गाविस २, देउखरम जन्मलक पुनिता चौधरी नम्मा समयसे सामाजिक संघसस्थाम काम कर्टी आइल बाटी। समाजशास्त्रम एम.ए कैसेक्लक चौधरी हाल रुपान्तरण नेपाल सस्थाम जिल्ला कार्यक्रम संयोजक बटी। अखिसके उँक्वार भेटम पुनिता चौधरीसे थारुन्हक लर्का छाई मनै सामाजिक क्षेत्रम आइबेर कत्रा संघर्ष करपरल कना विषयम लौव अग्रासन साप्ताहिके सन्तोष दहित से करल कुछ बातचित। 

आजकाल कहाँम ब्यस्त बाटी?

आजकाल मै, रुपान्तरण नेपाल मार्फत बहुसरोकारवाला वन कार्यक्रमम दाङ जिल्ला संयोजकके जिम्मेवारीम ब्यस्त बाटु।

कैह्यासे सस्थाम काम कर सुरु कर्ली?

यि संस्थाम मै २०११ अप्रिल महिनासे काम शुरु कर्लु। यीहिसे पहेले मै, बेलायती अर्न्तराष्ट्रिय सहयोग नियोग (डिफआईडी) क जिवीकोपार्जन के लाग वन कार्यक्रम (एलफपी) ओ बेसमसे काम सुरु कैलु।

छाई मनै उह फे थारुनके लर्का कसिख अइली यी क्षेत्रम?

कुछ बर्ष पहिले हमार दाङ जिल्लाक थारु समाजमा बिए पास लवन्डी मनै पनैवा मुश्किल रह। उह ब्याला ब्याकवार्ड सोसाइटी (बेस) एजुकेशन म गे्रजुएट पास कैलक थारु लवन्डीन चाहलरहिन उह सिलसिला मे मै यी क्षेत्रमा प्रवेश कैलु । एमने थारु समाजके जानपहिचान अग्रज डिल्ली चौधरीके भारी हात बतिन् महिह यि क्षेत्रमा आनना।

यी क्षेत्रम आइबेर अप्नह कत्रा संघर्ष कर परल?

संर्घष त प्रबेश करेबेर खास नैपरल तर जव प्रवेश कैगैल तव काम सिखकल संघर्ष कैगैल। काकरे कि मै यि क्षेत्रमे आइना से पहेले काम कैलक धेर अनुभव नैरहे। कैसिक काम कैना, सामाजिक परिचालन कना का हो? मै कुच्छु फे नै जानु। धिरे–धिरे काम सिकटी, पुरान यि क्षेत्रको अनुभवी तत्कालिन बेस दाङ जिल्ला के संयोजक दिप लाल दादुसे मै धेर बात सिकलु। बेसके अन्य मोर अग्रज सुपरभाइजर ओ खुद डिल्ली सर धेर अवसर महिह देलां।

छाई मनै बहार काम कर निहुइट कना कहाई हमार समाजम आम्हिन फे पलि बा, अप्न यि विषयम का कठि?

यि समाजिक स्वरुप ओ संरचना के फल हो। सामाजिक स्वरुप, रहनसहन वा संस्कृति एक थो समाज के कानुनहस बनगैल रहट। यैसिन ज्यादा जड बनालेले रहट कि जट्रा फे कानुन वा नीति बनैनसे फे हाली परिवर्तन करैना मुश्किल रहत। हमार थारु समाज किल नै कि हर समाजमे महिलाहे घर से बाहर जैना, पढनालिख्ना, नोकरी वा ब्यापारब्यवसायी कैना पुरुषके दाँजो परिवार ओ समाजके सहयोग कम बा। महिला सिर्फ प्रजननशिल कामके लाग हुइत वैनके काम लर्का पैना, घरपरिवार हेर्ना किल हो कन् मानशिक्तासे हमार समाज जकडल बा। महिला फे उत्पादनशिल क्षेत्र, राजनीतिक क्षेत्रमा आइपरथा कना हमार समाज मे अभिन फे कम मनैन सोचथाँ। धिरे–धिरे यि सब परिवर्तन हुइटि बा। छाई मनै फे धेर जाने बाहर काम करे जैना शुरुवात हुइलबा।

 आम्हिन फे हमार समाजम छाईलर्का औरघर जइना जात हुइट पह्रनिहुइट कठ यिहम अप्नह कसिन लागठ?

छाई लर्का औरघर जइना जात हुइट पह्रनिहुइट कना दाईबाबा आजकल कम हुइति जाइट। बरु हमार थारु समाजके आजकलके युवायुवति खुद सचैत हुइति जाइतबताँ कि बिना पढाईलिखाई आगे बढे नैसेक जाइत। छाइन मैनन् के भूमिका आब धिरे–धिरे घरपरिवार से बाहर अनेक रुपमा परिवर्तन हुइटि जाइता। छाइ मनै परिवार के छाइ ,पतुहिया, जनेवा या दाईक रुपमा कि सिमित नैहुके समाजमा अपन अलग पहिचान बनैति जाइटता।

अप्न सामाजिक क्षेत्रम काम कर्टिरहल व्याला खुशिके क्षण कैह्या पैइली?

यि क्षेत्रमा काम करेबेर खुशिकक्षण बिशेष कभ कना नै हो मोर। खासकैके जब हमरे गरिव, सामाजिक रुपमे पिछडल जातजाति, महिला ओ समुदाय हे कौनो फे बिकास के कार्यक्रम देथि जहाँ साँच्चिके सरकारके नजर वा सहयोग नैपुगल रथिन् उहाँ जव समुदाय लोग हम्रहिन मन से धन्यवाद देथाँ तब बहुत खुशी महशुस कैथु। यैसिन क्षण धैर पैइलेबतुँ मै।

अन्तम कुछु कहपर्ना बा कलसे?

मै अन्तमा हमार थारु समाज के युवायुवती हे संस्कार ओ चलनके नाममे जाँडदारुक कुलत मे अपन जिन्गी नैबिगारके पढाईलिखाई मे मेहनत कैना सल्लाह ओ सुझाव देहक जाहतु। छाई जातिनहे छावाक बराबर शिक्षा दिई। छाई ओ छावा बराबर मान्के भेदभाव नैबनाके शिक्षामा आगे पढैना सक्कु अभिभावक हुक्र्न हे फे अनुरोध करक जाहतु।