कैलाली– थारू नागरिक समाज कैलालीक आयोजनामे माघ १७ गते धनगढीमे ‘माघीक’ अवसरमे जलपान कार्यक्रम सम्पन्न हुइल। कार्यक्रममे थारू बुद्धिजीविहुक्रे दुःखी बिरामीन्के लाग एकठो एम्बुलेन्स लेहना ओ अइना दश बरषभित्तर एक अस्पताल बनैना प्रतिबद्धता जाहेर कर्लै।
माघीक अवसरमे “शुभकामना आदान–प्रदान, कार्य समीक्षा ओ प्रतिबद्धतासहित जलपान कार्यक्रम” के सहभागीहुक्रे थारू कल्याणकारिणी सभा कैलालीसे कैगिल थरुहट क्यालेन्डर प्रकाशन ओ बितरण एक ऐतिहासिक काम हुइल बटैटी अइसिन रचनात्मक काम आउर फे करेपर्नामे जोड देले रहैं। बर्का पहुना थारू कल्याणकारिणी सभा कैलालीक् सभापति प्रभात कुमार चौधरी, थारू कल्याणकारिणी सभा कैलाली सदा थारून्के हकहितके लाग लागल ओ अभिन फे लग्ना प्रतिबद्धता जाहेर कर्ले रहैं। उ कहनै– यकर लाग कैलालीक बुद्धिजीवि सबजे साथ भर देहे परी। खास पहुना थारू कल्याणकारिणी सभक् केन्द्रीय सदस्य एवं थरुहट तराई पार्टीक अध्यक्ष भानुराम थारू कहनै– ‘कुछ कमजोरी रहलेसे फे थारू कल्याणकारिणी सभा कैलालीहे साथ देहुइयामे पूर्व माननीय कैयाँ चौधरी अभिनसम लाइनमे सबसे आगे बाटैं।’ साथे उहाँ, थारू नागरिक समाज कैलालीके अभिनसमके काम सन्तोषजनक रहल बटैले रहैं। कार्यक्रममे थारू कल्याणकारिणी सभाके केन्द्रीय पार्षद एवं संघीय समाजवादी पार्टीक सचिव होरीलाल चौधरी चहलेसे कैलालीक् थारू जिल्लामे अस्पताल, कलेज समेत चलाइसेक्ना हैसियत रहल बटैटी अइसिन काममे सकहुन लागेक लाग अनुरोध कर्नैं।
दिनेश ग्रुपके जेनेरल मेनेजर बुन्दीलाल चौधरी, कैलालीमे थारून्के तरफसे एकठो एम्बुलेन्स एक बर्ष भित्तर किनेपर्ना ओ अइना दश बरषभित्तर एकठो अस्पताल बनाई पर्ना आवश्यकताहे अंगुर्यैेटी अपनत्वके लाग सबजे अपनही लागे पर्नामे जोड देहनै। नमस्ते बचत तथा ऋण सहकारी संस्थाके प्रबन्धक कुन्नुनारायण चौधरी थारू छात्राबासहे करिब एक लाख रुपिया सहयोग कर्ना प्रतिबद्धता जाहेर करल रहैं। कार्यक्रममे अपन बात रख्ती कमैया प्रथा उन्मूलन समाजके अध्यक्ष बसन्ती चौधरी, अधिबक्ता नाथुराम महतो, थारू कल्याणकारिणी सभाके सचिव माधव थारू लगायतके सहभागीहुक्रे बुन्दीलाल चौधरीक बातमे सहमति जनैले रहैं। कार्यक्रममे जिल्लाके ३६ जने सरकारी, गैरसरकारी कार्यालयमे काम करुइया थारू बुद्धिजीवि, समाज सेवामे लागल समाजसेवी, पत्रकार, अधिबक्ता, सर्वसाधारण सहभागी रहैं।
बर्का पहुना थारू कल्याणकारिणी सभाके सभापति प्रभातकुमार चौधरी, खास पहुना थारू कल्याणकारिणी सभाके केन्द्रीय सदस्य एवं थरुहट तराई पार्टीक अध्यक्ष भानुराम थारूसे ‘उँकुवार भेट’ करके कार्यक्रमके उदघाटन कर्ले रहैं। उदघाटनपाछे एकदोसर जे आपसमे उँकुवार भेट करल रहैं। थारू नागरिक समाजके जिल्ला संयोजक दिल बहादुर चौधरीक् अध्यक्षतामे उसरल जलपान कार्यक्रमके संचालन युवा समाजसेवी ठाकुर करियाप्रधान कर्ले रहैं कलेसे सहभागीन स्वागत कमैया प्रथा उन्मूलन समाजके अध्यक्ष बसन्ती चौधरी कर्ले रहैं। सहभागीहुक्रन जलपानके लाग ढिकरी, शिकारके ब्यबस्था कैगिल रहे।
थारू नागरिक समाजके लौव कार्य समिति
यहेबीच थारू नागरिक समाज कैलालीके ११ सदस्यीय लौव कार्य समिति चयन कर्ले बा। समितिके संयोजकमे फेर दिल बहादुर चौधरी सर्वसम्मत चयन हुइल बाटै। ओस्तके सदस्य सचिवमे ठाकुर प्रसाद करियाप्रधान, सदस्यमे बुन्दिलाल चौधरी, बसन्ती चौधरी, बुधराम चौधरी, शिवचरण चौधरी, नाथुराम चौधरी, शकुन्तला चौधरी, राखी चौधरी, कुन्नु नारायण चौधरी, पर्शुनारायण चौधरी बाटै।