काठमाडौं- कीर्तिपुरमे प्रत्येक महिनक् अन्तिम शनिच्चरके हुइना थारू कविता शृखंलाके छैठो भाग भानु जयन्तीके दिन मन्के जम्कल। क्षेत्रीय प्रतिभा पुरस्कारसे पुरस्कृत कवि, लेखक बमबहादुर थारूके बर्का पहुनाइमे हुइल कार्यक्रममे करीब १५ कवि कवियत्रीन् रचना सुनैले रहिंट। जेम्ने सुशिल चौधरी, कृष्णराज सर्वहारी, निशा चौधरी, राकेश चौधरी, मिनराज चौधरी, सीताराम चौधरी, नन्दुराज चौधरी, सानु चौधरी, रामनाथ चौधरी रहिँट। ओस्टक प्रसादु थारू, पुष्करराज भट्ट, तुला चौधरी, महादेव चौधरी, पूर्णा चौधरी, सियाराम चौधरी फेन अपन रचना सुनैले रहिँट। 
कार्यक्रम आयोजक संस्था बर्दियाली थारू विकास मञ्चके अध्यक्ष सिताराम चौधरीक् सभापत्तिवमे कवि गोष्ठी हुइल रहे। डोसर आयोजक संस्था सर्वहित समाज नेपालके अध्यक्ष नन्दुराज चौधरी बाचित कविताके कविलोगन् पुरस्कृत कर्ना ओ पत्रिका निर्कना सोँच रलक बटैला। कार्यक्रमके सहजीकरण टिसर आयोजक संस्था थारू युवा परिवार, काठमाडौके अध्यक्ष कृष्णराज सर्वहारी कर्ले रहिँट। यी तीनु संस्थाके संयुक्त आयोजनामे डश्यासे पहिले काठमाडौंमे टिकटमे थारू कविता कार्यक्रम कर्ना जानकारी ऊ अवसरमे डे गैल।