नविन चौधरी- देशम बह्रटी गैलक बेरोजगारी, खाद्यान्नके अभाव सँग–सँग विभिन्न संकट पैदा हुइटी रहल ब्याला एक्क गाउँक दुई दर्जनसे ढेर युवाहुक्र भारत पलायन हुइल बाट। दाङ सौडियार गाविस ८ शुक्रवारक युवाहुक्र रोजगारीके शिलशिलाम भारत गैल हुइट। आम्ही जैनाहुकनके संख्या तिव्र रहल बा। सद्द खेत्वाबारीम काम कर्लसेफे खैना, लगैना, बैस्ना लगायत धेर समस्या औंलकओर्से कुछु पैसा कमाजिठा कि कैख विदेश गैलक उहाँक स्थानियवासिहुक्र बटोइठ। विदेश जैनाहुक्रम १५ से ४० वर्ष सम्मक रहल बाट। ७० घरधुरी रलक गाउँम एक्कासि गाउँक अधिकांश युवाहुक्र विदेश जैनाले अत्राब्याला गाउँ सुनसान हुइल बा। ऊ गाउँक युवाहुक्र यीहिसे आघ मलेसिया, साउदि, कतार दुवै, कोरीया लगायत विभिन्न देशम बैदेशिक रोजगारक लाग पलायन होस्याकल बाट। विदेश जैनाहुक्रम प्राय थारु समुदायक युवाहुक्र रहल बाट। उह गाउँक मतावाँ लक्ष्मिप्रसाद चौधरी गाउँम आब खेतिपाति फे ढिल ओ कोक्नी उत्पादनम फे कमि अैलकमार अधिकांश युवाहुक्र विदेश जाई पर्लक बटोइल। उहाँ आम्ही फे यी गाउँक थारुहुक्र जिम्दारनके जग्गा जोत्क आपन जिविका चलैटी रलक कटी आपन गृष्टी बनाइक लाग फे भारत जाई पर्लक बटोइल। जलबायु परीवर्तन सँग खेतिपाति कम ओ देशके अर्थतन्त्रम समेत घट गैलकओर्से थारु जातिके प्राय युवाहुक्र वैदेशिक रोजगारके लाग विदेश जैटी रलक उहाँके कहाई बाटन्। ओसिन ट थारु जातिहुक्र ढेर खेतिपातिम आश्रित रठ। आपनठे सिप ओ क्षमता रटी–रटी फे कैयौ युवाहुक्र विदेशओर पलायन हुइबेर सलहो देशके दक्षजनशक्तिम अभाव देख परल बा।
ओस्टक पलायन हुइलक युवाहुकनके घरपरिवार आर्थिक अभावक कारण छावाहुक्र भारत गैलक बटोइठ। उहाँहुक्र आपन लर्कापर्कन् शिक्षा, स्वास्थ्य, ओ सन्झ्या विहान खैना ओ लगैना प्रमुख समस्याले सटैटी रहबेर अप्न जो भारत पठैलक बटोइल बाट। खेत्वम जत्रा काम कर्लसे फे आर्थिक अभाव हुइटी रना आपन देशम रोजगार निपैनाओर्से भारत पलायन हुई पर्लक उहाँ हुकनके कहाई बाटन्। उह गाउँके शिक्षक काशिराम चौधरी कतिपय घरपरीवारहुक्र खैना लगैना ओ बैस्ना समस्या भोग्टी रलक युवाहुक्र भारत गैलक ओ कुछु युवाहुक्र घरम होक फे रहरले गैलक बटोइल। उहाँ भारत जाईबेर फे कम लगानिम जाईसेक्जीनाओर्से ओ औरजन्हक लह(लहैमा पर्क फे आपन पह्राईह मैया मार्क वैदेशिक रोजगारके नाउँम कुछु युवाहुक्र भारत गैलक बटोइल। ओस्टक उह गाउँक समाजसेवी केशव चौधरी आपन आर्थिक अवस्था सुधारके लाग कौनो भारत गैलसे फे कौनो युवाहुक्र प्रतिस्पर्धाके लाग भारतओर गैलक बटोइठ। फलानाके मोटरसाइकल बा, मै काजे निकिन्ना कना भावनाले फे रोजगारीह आधार बनाक विदेशओर पलायन हुइलक उहाँ बटोइल। उहाँके अनुसार एक्कासि आपन गाउँक अधिकांश युवाहुक्र भारत गैलक यी पहिला उदारहण हो। भारत जैनाहुक्रम अधिकांशसे ढेर स्कुले विद्यार्थी रहल बाट।
रोजगारीके नाउँम पलायन हुइलक शुक्रवारके जस्त हमार गाउँघरम असिन ढेर उदारहण देखपर्ठा। एक्कासि असिक विदेशिना कारणले कयौ जहन अकालम ज्यान गुमाई परल बा कलसे कयौ अलपत्र परल बाट। राज्य फे असिन प्रवृत्तिहँ रोक्ना आवश्यक बा। सिप, क्षमता ओ दक्षता हुइलक युवाहुकन आपन देशम जो रोजगारीके व्यवस्था मिलाई सेक्लसे वैदेशिक रोजगारह कम कराई सेक्जाई। थारु बुद्धिजिवीहुकनके अनुसार देशमा दक्षजनशक्ति हुईटी(हुइटी फे बर्षेनि हजारौ थारु समुदायका युवावर्गहुक्र विदेशिनाओर्से समग्र राष्ट्रह जो असर पर्टी रलक बटोइठ। थारु युवाहुक्र केल निहोक और गरीब, निमुखा, पिछडावर्गहुक्र फे बैदेशिक रोजगारम जैना कर्ठ। उहओर्से यि विषयम सक्कुन्हक ध्यानकर्षण हुइपर्ना जरुरी रलक थारु बुद्धिजिवीहुकनके कहाई बाटन्।
साभारः २१ भदौ, गोरखापत्र