सोम डेमनडौरा।

महादेब रत्गैंयाजी फेसबुक वालम फागुन २४ गटे राजापुर २, सोनपुर, बर्दियाम ठारु डेउठन्वा उद्घाटन कर्लक फोटु पोस्ट कर्ल बाट । खुसी लागल् । संसदीय विकास कोषसे थारु समुदायक धर्म व पहिचान स्थापित हुइना मेरिक काम हुइटि बा । याकर लाग डा. गोपाल दहितज्यूहँ बखारिक बखारिक धन्यबाद बा । थारु समुदायसे गैल सांसद हुँक्र यिह मेरिक आपन समुदायक विकास, पहिचान बचैनामेरिक काम कर्ना जरुरी बा । थारु समुदायक धर्म, संस्कृति कलक पहिचानक पहिला सिर्हिं हो कना म्वार बुझाई हो । यिह पहिचान बचाइक लाग पहिला ट आपन घरक डिहुरारम रलक डिउँटन् चिन्ह परल् । आपन घरक डेबि डिउँटन् निचिन्हट् सम् धर्मक महत्व व महिमा निबर्हठ् । जब आस्था कम्जोर होजाइठ् ट पहिचानक लराइ फे कम्जोर होजाइठ् कना म्वार बुझाइ बा । ओसहँक, घरसे बाहिर रलक गाउँभरिक सझ्या डिउँटा रना घर हो डेवठन्ह्वा । घरक डिहुरारम रना डिउँटा व गाउँक सझ्या डिउँटा रना यि थारु समुदायक आपन मेरिक छुट्ट पहिचान हो ।

समाजक अस्तित्व, संस्कृति ओ संस्कार यिह धर्मसे जोर्गैल् रहठ् । याकर संरक्षण ओ विकासक लाग लग्ना बरवार काम हो । बड्लटि रहल् व विकास हुइटि रहल् समाजम कुछ परिवर्तन अइना स्वभाविक बाट हो । समयक मागहँ हम्र स्विकारक फे चाहि । यि मेरिक डेवठन्वा हम्र सक्कु गाउँक बनाइ सेक्ना हो कलसे हरेक पुस्टक मनैन याकर बारेम जन्ना बुझ्ना कर परहिन् । निबनाइट् सम् किऊ निड्याखठ् । निकहट् निब्वालट् सम् किऊ नि सुनठ् । निकरट् सम् किऊ निकरठ् । उहमार फे यि मेरिक कदम चल्ना जरुरी बा । हमन् चिन्हैना चिज बस्तु निरहठ् सम् किऊ फे हमार बारेम खोजनिति निकरी । यि ऐतिहासिक काम हो । याकर दस्ताबेज रहठ् । ऊ दस्ताबेज कलक इतिहास् हो । यिह इतिहास् भबिस्यक पुस्टक लाग स्रोट बनठ् । यिह चिज हमारठे कम्जोर होक फे पहिचानक लाग कर पर्ना जरुरी बनल् बा ।

म्वार कहाइक मटलब यिह ऐतिहासिक निर्माणले केल हमार पहिचान बचट कना नि हो । यिहिंसे भारि खन्ढक्का बा । उ हो शैक्षिक ओ आर्थिक परिवर्तन । यि डु चिजम थारु समुदाय विकास निकरठ् सम् अउर चिजक विकास खोज्ना प्रायः असम्भब बा । उहमार धर्म, संस्कृति हमार पहिचान हो ओ यि पहिचानहँ बचाइक लाग शिक्षा ओ आर्थिक क्रान्ति हुइना जरुरी बा ।

तराइ कलक थारुहन्क भुमि हो । थारु भसम थरुहट कहिजाइठ् । यि थरुहट्क भुमिपुट्र थारु हुइट । सक्कु समुदायक मन्दिर, चर्च, मस्जिद ढमाढम बनटा । टर थारु समुदायक रहल् ठन्ह्वा फे उजर्टि जाइटा । यिह ब्यालम् यि मेरिक कामक प्रसंसा बरवार बा ।

यिह मेरिक काम करबेर कुछ चिजम ढ्यान डेलसे आभिन् प्रभावकारी रहि । फोटुम, ब्यानर, लउव ठन्ह्वा, ठन्ह्वा उद्घाटन कर्टि रलक दृष्यबा । फोटु हेर्क कुछ बिचार मनम आइल् ।

१. ब्यानरम मिति

पहिला चिज ब्यानरम मिति नि हो । एक्क ब्यानरले कैय ठाउँम काम चलैना यि मेरिक कस्ट इफेक्टिभ हुइना मजा हो । तर, थारुन्हँक ऐतिहासिक डेवठन्वा उद्घाटन करबेर मिति रहल् ब्यानर हुइना जरुरी बा । उद्घाटन करल् मनै अपन्हे मिति बिस्राडर्ठ कलसे जे याकर बारेम अध्ययन कर खोजी कलसे याकर यकिनन् मिति कहाँ पैना? फोटु सब्से बल्गर व सहज दस्ताबेज हो । उहमार मिति जरुर ढर्बि ।

२. ब्यानरक भासा व सहकार्य

ब्यानर बनाइबेर भासाहँ फे ढ्यान डेना जरुरी बा । यि फे अध्ययनक सामाग्री हो । थारुन कसिक बोल्ठ? हिंकन्हँक भासा का हुइटिन् ? किहिंका का कठ ? यिह ब्यानरसे ढ्यार चिजक जानकारी मिलठ् । जस्ट कि, थारु देवथन्वा । थारु लवजम  थारु डेवठन्वा, थारु डेउठन्वा, थारु डेवठन्ह्वा हुइपर्ना हो कना म्वार बुझाइ हो । ओसहँक आयोजक थरुहट तराइ पार्टि नेपाल रलसे फे संयोजन, सहकार्य, समन्वय या का ढर मिल्ने रह, बरघर समिति ढर पर्ना हो । ठन्ह्वक सञ्चालन् बरघर प्रणालीसे चल्ना हुइलक ओर्से सामाजिक व सांस्कृतिक अपनत्व बर्हैना जरुरी बा । जब सामाजिक कामम् अप्नत्वक कमि हुइठ् कलसे याकर संरक्षण ओ विकासम फे समस्या आइ लागठ् । यहि हम्र हमार सामाजिक प्रणालीहँ महत्व ओ ठाऊँ डिह हिच्किचैबी कलसे अउर जे झन् के डि ? उहमार, गाउँक बरघर प्रणालीहँ फे ब्यानरम समाबेस करैना जरुरी बा ।

३. उद्घाटनक छाँकि बुन्डा

फोटु अन्सार, गुर्वक मर्यादाक्रम निडेख्परल् । थरुहट तराई पार्टी नेपालक अध्यक्ष भानुराम थारु व बरिष्ठ नेता डा. गोपाल दहित छाँकि बुन्डा चर्हैटि उद्घाटन कर्टि बाट ।गुर्वा बैठल् मनैया हुइट या ठिहुनिम हाँट ढर्क लिउह्रल् मनैना, यम्न चिन्ह निसेक्ना मेरिक प्रस्तुति बा । जसिहँक अउर समुदाय या धर्मक पुजारी, महन्ठ, मौलाना, पादरी रठ, उहमेरिक हमार गुर्वनक स्थान, पद, हैसियत व इज्जत डेना जरुरी बा । गुर्वक सिखाइ या नेतृत्वम छाँकि बुन्डा सहित उद्घाटन कर्लक संस्कार बल्गर डेखैने रह कि कना हो ।

४. ठन्ह्वम डेबि डिउँटा

ठन्ह्वक उद्घाटन करबेर ठन्ह्वम डेबी डिउँटा पदस्थापन करल् रलसे आभिन् मजा हुइने रह । फोटुसे जो सक्कु चिज झल्कने रह । अउर समुदायक मनै या हेरुइया मनै सहजरुपम थारु समुदायक डेवठन्वा वा डिउँटनक बारेम जन्ना उत्सुकता बहर्ने रहिन् ।

५. पुजापाठ-दर्शन

उद्घाटन करल् पाछ सक्कु पहुनन् दर्शन कर्लक पाछ सहभागी हुँकहन् फे दर्शन कराइक चाहि । ठन्ह्वम दर्शन कर्ना चलन् नि हो । गार्हो सार्हो परल् ब्याला घरक ओ गाउँक डिउँटन् सम्झठि । टर ठन्ह्वक पन्ज्रसे जाइबेर फे हम्र आपन डेउडिउँटन् दर्शन निकर्ठी । कहुँ मन्दिर डेख्टिकि हाँटहँ छाटि व मुरिम लगाक ढ्वाग सलाम लाग्ढर्ठि । टर आपन डिउँटन् हेलाहा कर्ठि । डेवठन्ह्वा उद्घाटन् करल् ब्याला सक्कुहन् पालिक पाल्या दर्शन करैना संस्कार बैठैलसे धार्मिक आस्था बहर्ने रह । यम्न महिला सहभागिता बर्हैना जरुरी बा ।

६. साँस्कृतिक झाँकी

यिह मौकम एक डुठो साँस्कृतिक झाँकि डेखाइ सेक्लसे आभिन आकर्षक हुइने रह । पहिल पहिल थारु समुदायम, ठन्ह्वम बोक्सिन्यन् नाँच जैठ कना अन्धबिश्वास रह । यि मेरिक सोंचाई आभिन् फे पलि बाटिन् । स्याकट् सम् जन्नी मनै ठन्वक डगर कम नेंग्ना कर्ठ । लर्कोर्हा जन्नी मनै झन् गार्हो मन्ठ । यदि साँस्कृतिक झाँकि कराइ सेक्जैने रह कलसे, यि मेरिक सोंचाई कम हुइने रह ।

समग्रम, थारुन्हँक धर्म, संस्कृति, अस्तित्व व पहिचान स्थापनाक लाग यि बरवार काम हुइटि बा । थारु हुइटि ओ हमार संस्कृति असिन रहठ् कना बल्गर आधारक स्थापना कर्टि बाटि । असिन कामक लाग निरन्तर मन बल्गर हुइटि जाए ।