सोम डेमनडौरा

भ्वाज हालहाल निकर्बो ट असिन फोन आइठ्

बाफरे बा। बाट छोर्डि। कट्रा चौंकस् हुइल् कना अप्नहँ का पटा?

हो, ढ्यार साल पाछ मन्का राहारंगिट कैगिल्। हमार घुमाइ बरा मैगर हुइल् यि फ्यारा। दांग घुमाई। निउटा आइल् रह जे ट थारु साहिट्यम लौव युवा व लावा डग्गरक बार्षिक उट्सव मनाइ जाइक लाग। दांगक कोठरी कना ठाऊँ। म्वार लाग लउव ठाऊँ रह।कोठरी कलसे मै कोठर्वा सम्झनु झ्वाट्ट। बर्का भुर्वा महल्। मल्कान, जिम्डर्वक महल्। हमार गाउँम भरत बहादुर शाह कना एकठो जिम्डर्वा रह। यिह साल ओराइल् ऊ जिम्डर्वा। हमार बाबक मजा सम्बन्ध रहिन् ऊ जिम्डर्वसे। हो, याकर केल सब्से ढ्यांग महल् रहिस् रानपरोस्क गाउँम। उज्जर महल् हुइलक् ओर्से भुर्वा महल् कहँठ् सब्जे। गाऊँक मनै कोठर्वा कहँठ्। कैय क्वाठक घर। धन्सार रहल् घर। सायद कोठरी अस्ट हुई कना मै अनुमान लगैनु।

ठाकुर गोचा व लब भाइसे सल्ला हुइटि रह कोठरी जैना। निउँटा आधिकारीक निआइल् रह। एक मन छगुन फे कर्टह। मलेशीयासे राज दंगाली म्यासेज बक्सम निउँटा ट डेल रल्ह, टर गाँठ् पर्ना मेरिक निउँटा निरह। काठमाण्डुम बैस्टि रलक दांगक युवा साहित्यकार पुनाराम कर्याबरिक्का हमार जंग्रार साहित्यिक बखेरीक कैयौठो कार्यक्रमम आसेक्ल बाट। अब्खिस्क पाँचौ बार्षिक उत्सब बनाइबेर ट झन् दुख कर्ल। एमालेक बन्द रह ५ नं. प्रदेशम। टर फे अटो रिक्सा रिजर्ब कैक फे पुग्ल राजापुर। राटभर स्टेज सजैनाम जार मुक फे सहयोग कर्ल। थारु साहिट्यम लौव युवा चलैना भूमिका पुनारामजीक फे बाटिन् कना सुन्मिलल् रह। उहमार, रिन टिरक लाग हम्र जसिक फे कार्यक्रमम पुग्ना जाँगर जुटैलि। ड्वासर कारण फे रह। उह बहानामा दाजु कृष्णराज सर्बहारीसे भ्याँट हुइना व ज्ञानगुनक बाट सिख्ना। उहमार ज्या परिपरि कैक हम्र टिन्यो डाडुभाई ग्वाचा भिर्ना समय जुरैली।

जैनासे पैल्ह, ठ्याक्क बालिकाजीसे फोनम भ्याँट् होगैल्। जीवनका बक्र रेखाहरुक लेखिका। मै कनु कहाँ हेराइल् बाटि अप्न? जवाफ डेलि गुप्तबासम रहुँ। आब पुर्सद मिल् रहल्। मै दांग जैना बाट सुनैनु ट उहौ जैम् कली। आब कुल चारजन हुइना हुइली। पाछ युवा गायक दर्पण भाई व समिक्षा फे जैना बाट आइल्। संगसंग कतारसे भख्खर नेपालम ग्वारा टेक्लक भाई नरेश अर्पण कुसुम्या फे जैना बाट आइल्। ठिक्क उह ब्यालम् थरुहट तराई पार्टीक नेता कहि या एसि होटलक मालिक, दाजु पुर्ण बहादुर म्वार गाडी लैजाई कल। कोठरी बरा डुर बा कल। मै होलो डामम लैजाडिहम कल। मै संघर्यनसे सल्ला मिलाइबेर हुँक्र ठिक बा जैबि कल।

राम डे, जैना डिनसे पैल्हक राटभर बानी बर्सल्। बिहानसम् पानी बर्सटि रहल्। आब ट झन गाडि रिजर्ब करहि पर्ना स्ठिटि आगैल्। कुछबेर पाछ, लब भाई खबर कर्ल कि दर्पण व समिक्षा मोटरसाइकलम हिरिक डेल हुँ। नरेश भाई भख्खर घर पुग्लक ओर्से जाई निसेक्ना खबर आइल्। फेरसे क्यान्सिल् कर्डेलि गाडी। ठाकुर गोचा, लब भाई व बालिका जीहँ न्याँग कैडेनु बर्दियासे। पानी निम्सट् निरह। अस्या लागट् लागट् ४ बजे केल नेपालगंज पुग्ल बगाल्।

माघ १४ गटेक डिन। नागरिता अन्सार म्वार जर्मलक डिन। म्वार जन्निक इच्छा रहिन् आझुक डिन घरहिं बैठ्लसे जरम डिनिक रमाइलो कर्ना। मै फे अगुन मन छगुन रहुँ। आब असिन पानीम जाइ निसेक्जाइ। सन्झ्या फे होगैल् रह। उहाँ पुगठ् पुगठ् ठाँट् बाँट्क ठेगान नरहि। आझ निजाइ। काल भिन्सर्ह्य उठ्क जैना सब्क सल्ला मिलल्। मै कनु आझ् हमार झोंप्रिम बस्यारा लि। डेर किलो मुर्गिक सिकारले म्वार जरम् डिन मनैली रस्गरसे। राट्क बेरटक् थारुसाहिट्यक अभियान, संस्था, किताब व साहित्यकारन्क बारेम बाटचिट् हुइल्। समग्रम आभिन् ल्वाभलग्टिक युवा जोस रलसे फे ल्वाभ लग्टिक थारु साहिट्य सिर्जना कर निसेक्गैलक बाट उठल्।

उह मौकम म्वार सम्पादनम २०६० सालसे निक्र भिर्लक सरासर साहित्यिक पत्रिकमसे बालिकाजीक कबिता व ठाकुर गोचक पहिला किताब तुहाँर सम्झनामन् मसे कबिता फे सुनैनु। लर्का डंग पर्गिल। काल बिहान ५ बजे उठ्ना व साह्रे पाँच बजेक दांगक गाडी पक्रना निर्णय सहिट पठि्रम ओंड्रली।

बिहान्ने घरमसे निक्रटी कि अंढारम चर्यो जे एक सेल्पि्क लेली। टुरुन्ट फेसबुकम हम्र नेंग्गैलि कैक फोटु शेयर कर्डेली।

पुष्पलाल् चौकसम् पुगट् पुगट् कम्टि ढ्यार बट्वा स्याकल् रहि। ओहो, ऊ बाटक् कौनो सिवाना निरह। माघक जार कहाँ रह पटै निमिलल्।

ठाकुर गोचा व बालिका जी गाडिक सब्से आघक सिट डैबर्वक पन्ज्र बैठ्ल। मै व लब भाइ ड्वारि टर्का सिटम बैठ्ली। कबु मैयक बाट ट कबु सैंयक बाट। गाडी उपड् खाभट् रलक पट्ट निपाइल्। एक्लाग कोहलपुरिक बसपार्कम चिमचाम। महाबेर रुकल् गाडी, मानौ उ हमार बाट सुन्क मिच्छा गैल रह कनाहस्।

गाडिक कन्डक्टर्वा डग्रिमका एकठो बज्यहँ ढोंटि कैक गर्याइटह। मै कनु ट्वार बाहुन पण्डिट्वन फे ट ढोंटि लगैठ जे रै। ओसिक कह हुइठ् कनु। का कहठ्, होइन दाई उनीहरुको अर्कै धोंती हो नी। मै कनु ढोंटि कलक ट ढोंटि हो जे। त्यो त हो दाई कहठ्। बाट यिह ट बा, अप्न आपनहँ चिन्ह निसेक्ना अउर जहन ढिठ् मारमार गर्यइलसे कहुँ बनी।

बाँकेक अगैया ठेसे एकजन जन्नि चहुर्लि एकठो तिनचार बर्सक बच्चा लेल। दांगक नारायणपुर लैह्यर जाइटहि। हम्र हमार गफम झुमल् रहि। याट्रुन हमार साहित्यिक व प्रेमिल् गफसे रोमाञ्चित रल्ह। मानौं हुँक्र कौनो नाटकघरम नाटक ह्यारटल्ह।

बस् कब कब अमिलिया पुगा राखल् रह हमन। डिन्चे घुमाहुँर हुइलक कारन हुई म्वार पन्ज्र बैठल् उह जन्नी झिल्लि सुढाई लग्लि। आब भइल् फसाड्। टिप्पा पुगट् पुगट् ट कैचो हो कैचो नि। मै कनु बर्का ठुल् ज्याकेट लगैल बाटो। चैन खोलो। ड्वारिक सिसा खोलो। डानडान् जुर हुइ ट, मजा लागि टुहिन्।पुरा असिन पसिन होगैल छावा डाई।

उह उह उह………वाऊ……डाहिन पाँजर डेखैटि मन्का जोर्से चिल्लैली नेपाली खैरिन्या। खैरापुर गाउँ हुइलक ओर्से मै खैरिन्या नाऊँ ढर्डेल बाटुँ बालिकाजीक। बिडेसिन लगैनाहस् टोपी फे लगैठि, पाइन्ट फे। उहमार फे खैरिन्या।

हम्र चकिट पर्गैलि डेख्क। जिन्गिम निडेख्गिल् रह ओसिन्। तराईक कुहिरम् हेराइल् मनै पहारम का डेख्बि। पुरा, पहारक टर बड्री। हम्र बड्रिक उप्पर। मै आब बयान कर निजान्ठुइठु। असिन मजा रह कि का बटाई। ढक ढक उज्जर। रुवा रहठ् जे, हाँ उहिंसे सुग्घर बड्री फुस्फुसाइटह। हमन् डेख्क लजाइटह। मुस्कुराइटह। वाकर उपार उज्जर पर्वट्वा टल्कटह।हमन लाग्टह, मानौं हम्र पहिला फ्यारा केक्रो मैयम चुर्लुम्म बुरल् बाटि। केक्रो क्वारक डन्डुरम कसकसाइल् बाटि। असिन मन बहलैना महोल् रह। असिन मनमोहक दृश्य रह। गाडिक भिट्रहँसे आपन मोबाइल्से झ्याम झ्याम फोटु मार्डेनु। कहाँ हौस बटाई। डैबर्व बल कैक फे गाडी रुकैली। भिरभिर्ह्यँट् डौर्टि फोटु खिचाइ चल्डेली।अमेलिया तुल्सीपुर्क पर्वट्वा भन्ज्यांग डाँडा।

कै मेरिक फोटु खिचैली कै मेरिक नी। कबु उठ्क, कबु बैस्क। कबु पुरा हिरो हिरोनी स्टाइल्म। असिन चौंकस् ट जिन्गीम बहुट कम कैगिल् हुइ। हमन कुछ लउव फुरहस् लागल्। असिन् असिन सुग्घर ठाउँम मन मिल्ना संघर्यनसे डिल खोल्क रमाइ पैलसे पो मनै जिन्गी पाइलहस् लग्ना हो। टेन्सन् डुर हुइठ्। लउव बिचार फुरठ्। लउव सिर्जना हुइठ्। उहमार सायद बिडेसिन ढ्यार विकास कर्ल कि भ्रमणक माध्यमसे? महि ट अस्ट लागठ्।

एकठो पर्बटिन्या जन्नी रह पाइन्ट लगैल। म्वार पन्ज्र बैठल् रह। मै कनु चोल टैं फे फोटु खिचाई। आपन ठर्वहँ फोटु डेखाइस् व कहिस् कि हेर बुढा कहाँ कहाँ पुगेर आएँ? पुरै बिदेश घुमेर आएँ नी। हो, यसैगरि भन्नु। मुसुक्क हाँसल् व कहल् मेरो ब्याट्री सकिएको छ। मै कनु, मोबाइल्को ब्याटि्र पो सकिएको होला, तपाईको कहाँ सकिनु। जाम, मेरो मोबाइलमा खिचाउनु। अनि शेयरइट बाट लिहाल्नु होला। टर उ जैब्य जैब्य निकरल्।

गाडिमका अउर मनै कहटल्ह, जिन्गीक मजा ट यि बगाल पो लिहल्।असिन लाइफ हुइक चाही।हमन असिन सुन्क आउर मजा आइटह। लागटह, हम्र फे संसारक मनक धनी मध्यम टप टेनम पर्जैबि सायद।

लेऊ जा। कबकबतुल्सिपुर पुग् स्याकल् रहि।

उहाँसे फोन लगैली सर्बहारी दाजुहँ। बालिका जी बट्वैली हलो कर्टि। उहाँसे हमन खैरासम् पुग पर्ना हुइल् बसम् बैठ्क। वहाँपुग्क हमन किऊ लिह आइल् बा कि नाई कैक चिटैलि। किऊ नि आइल् डेख्क बालिका जी फेर्से फोन लगैलि। सर्बहारी दाजु दुई जहन् बाइकम लिह तुरुन्त पठैलक जानकारी डेल। हम्र नेंग्डेली लखर लखर, जहाँ भेटैबी उहैं चहुर्बि कैक। कुछघचि पाछ काठ्माण्डुक लाग नाइट् गाडी आपन नम्बर लिह जाइटह। ओम्नहँ चहुर्क चल्डेली। ब्लुटुठ् स्पिकरम फुल् साउन्डम थारु गिट घन्कैटि चल्डेलि।

जे होस्, कोठरी पुग्ली अच्छासे करिब एघार बजेओंर पुग्ली।सर्बहारी दाजु, कोपिला सर, आरके स्वागट, शिबहरी जी, सागर जी लगायतक संघर्यन हमारसंग कल्वा खाइक लाग हमन अस्या लाग्टल्ह। पटा मिलल् कि स्टेज आभिन् टयार हुइल् नि हो। आयोजक लोग कहाँ हेराइल् बाट पट्ट नि हो। सर्बहारी दाजु कठ, अरे भाई अप्नहुँक्र काल नि अइलि बहुट ठिक कर्लि। हम्र ट बहुट दुख पैलि। किटाबिक भर्वा रह। लिह आउ कलक ट पठैल बाटि कहट् कहट् झमक्क राट पर्गैल्। किऊ निआइल लिह। बस्यारा ट अउर घर लेलि। आझ बिहन्य हेरि, पुरा लिड्रल बाट लर्का। आभिन् सम् हुँकन्हँक ठुट्ठुन् भँक्राइन् गन्ढैटि बाटिन्।

कोठरिक नेंढान घर हम्र मुर्गिक सिकार व सिन्किसँग कल्वा खैली मन्का। टब नम्गोर्ली कार्यक्रम हुइना ठाउँओंर। उहाँ पुग्ठि ट बाजा अकल्हे गाइटक स्टेजक पन्ज्र। काकरि काकरि कना हुइल् बरा घचिक ट। डोस्र मै आपन झ्वालम जकैलक २०६१ सालक सरासर पत्रिकमसे सर्बहारी दाजुक गजल बाचनसे सुरु कर्डेनु ब्वाल। करिब एक घन्टा पाछ एकठो गोन्या लगैल एनाउन्सर अइलि कार्यक्रमक सेड्युल बनाई।

यि फ्यारा मै पाँच ठो सम् लउव कबिता लैगिल् रहुँ। एकठो छन्दम लिख्ना प्रयास कर्ल रहुँ। यि फ्यारा सर्बहारी दाजुहँ लउव स्वाद डिहम् कना बरवार आस रह। दाजुहँ म्वार कबिता सुन्ना फे अरजी कर्ल रहुँ। टर दाजु व दाजुक बगाल उहाँसे उठ्क चलागैल् कार्यक्रम बिन निम्जल। मनैन्हँक आपन ब्यस्तता फे रहठ्। टर खासम ट कार्यक्रमक दम बहुट कम रहिस्। उहमार हो कि संका फे लागल्। दाजुसे मजासे बट्वाई फे निमिलल्।

कार्यक्रमम लावा डग्गर त्रैमासिकसे सख्या गिटक मोर्हिन्या गोमा देबी चौधरी, रेडियाकर्मी शिबहरी चौधरी व युवा साहित्यकार पुनाराम कर्याबरिक्का सम्मानित व पुरस्कृट फे हुइल। टर हुँकन्हँक योगदानक बारेम चर्चा बहुट कम हुइल कि कनाहस् लागल्। हेरुइयन सुनुइयन सिखाई हुइना मेरिक निहुइल्। कैय ठँर्या गजलकारनक गजल सैका फे बिमोचन हुइल्। मैह्यौं किटाब उठैना मौका पागैनु संगसंग।  एकठो मैगर भ्याँट हुइल् मैगर मनै पत्रकार सन्तोष दहित, माधब चौधरी व नन्दु सरसे बुहट साल पाछ। मनम आनन्द आइल्।

सभापतिक कुर्सि सुनसान रह। अध्यक्ष राज दंगाली मलेशिया से आइ निसेक्ल। भाई बुद्धिराम कार्यबाहक अध्यक्षक हैसियतले सभापतित्व कर्ल रल्ह। कार्यक्रमक सारा भर्वा अकल्हे उठैल रल्ह। छटपट छटपट कर्ना ठिक्क। कार्यक्रम सञ्चालिका फे लउव रल्हि काहुँ महा ढिल्फोस्रारहस् चलैलि। उह सन्झ्या सुझाब फे डेडर्नु।

जिऊँ सन्झ्या टिऊँ झकझक माहोल्। थारुन्हँक चाल अस्ट हो कि का, जाँर लग्लसे चौंकस् हुइ जन्ना? पाछ ट मै फे मन्ड्रा लेल कुडुक डेनु दांग अइलक साँवा उटार। जिऊँ सन्झ्या टिऊँ खैना व बैठ्ना समस्या हुइनाहस् चालमाल लागल्। खुसुक्कसे ठाकुर गोचाहँ कनु, गोचा खैना बैठ्ना बुझ्बी कसिन बा। नि ट हम्र आपन टरिकाले इन्टजाम कर्बी। गोचा कुछ बेर पाछ कल यिहैं हुइटा।

कार्यक्रम निम्जल्, नेंढान घर भाट खैना खबर पुगल्। उहँर कोपिला सर हुँक्र, खैना बैठ्ना बेवस्ठा निहुइ ट घोराही अइबी कैरख्ल रल्ह ठाकुर गोचाहँ काहुँ। टर यिहैं होजैनाहस् हुइलक ओर्से निजैना कैडेल।नेंढान घर पुग्लि। ना आयोजक ना सायोजक रल्ह। अस्या लग्लक डुइ घन्टा हुइ लागल् ट बुद्धि भाइहँ फोन कर्नु। ऊ कल मै आब्बहें आगैनु दाजु। करिब आढा घन्टा पाछ अइल व कठ दाजु आज टिनाटावन बनाइ निसेक्गैल। राट पर्गिल मिल्बे निकरल्। मै कनु ज्या बा ट्या खवाऊ भाई व सुट्ना ठाँटम लैजाऊ हमन।

लर्कन्हँक ट्वाँटा टिन टाल्ह्या ख्वाजटहिन्। कहोंर कहोंर से पुरा झर्सांइन् लन्ल। भिर्डेल मुरैक अचारसँग। कार्यक्रमक समिक्षा टबहें करि कलक आयोजक किऊ नाइ। लर्का खोब मुर्मुरैल। कुछ घचिक पाछ टाटुल गिलगिल् भाट आइल् टठ्यम। सिन्कीक झ्वार। मन्का नोनार रह। गिल्प्वाँक भाट खाइ निसेक्ना मनै टिहुँपर नोनार व आमिल् सिन्की, भैगिल् फसाड्। करक बल करैला ट खाइक परल्। टर महिं ट करैला मन परठ्, चहा जट्रा टिट् रह।

बालिकाजी आपन गन्तब्यओंर डिनहँक लाग्गैल रहि। मै, ठाकुर गोचा, लब भाइ, सागर व अजराइल् भाइ बाँकि रल्हि। बुद्धि भाइ सुटाइ लैगिल। उह भाइक कर्रा रहिन्। एकठो घर गैली। वहाँ ट पठ्रि अगोर स्याकल् रल्ह, राट बहरसेक्लक ओर्से। हुइना फे राटिक ग्यार बज्गैल रह। ड्वासर घर गैलि बराढ्यार नेंग्क। उहाँ फे सुट्स्याकल् रल्ह। हुँक्र डन्डुर पठ्रि छोर्क अउर घर गैल ओ हम्र भन्सुनैटि बस्यारा लेली ऊ राटिक लाग। बुद्धिराम भाइ अंढारम आपन घर डेखैटि भिन्सर्ह्य अइना बाट बट्वैल।

हम्र सल्ला मिलैलि सक्कर्ह्यं पाँच बजे उठ्क नेंग्टि खैरा पुग्ना। ड्वासर बिहान हेग्नर्यम् पानी नाइ हेगु कलसे। ठाकुर गोचा अउर डुरिक घरम से एक बाल्टिन पानी लन्ल नाहुँ हलुक हुइल् ज्यान। कोठरीसे पाँच बयालिस्म नेंग्लक मनै ठ्याक्क छ बयालिस्म घरी हेर्ना मौका जुरल्। खैरा पुग्ना पाँच मिनेटक डगर बाँकि रह।

खैरा पुग्क, चिया पाउरोटि व छोला बजाडेलि टिन्यो भाई। डगरम मन्का बाट हुइल्। के कसिन बा, छल्छलाहा कि सज्जन, टग्रा कि ढिल्ढ्वाँगर, का का हो का का नि। ठाकुर गोचा पुरन्या नेपाली व ठारु गिट सुनैटि सुनैटि डगर कट्वा डर्ल।

हम्र नारायणपुर पुगल् बाटि। कहाँ बाटो। टुहाँर घर जैना डगर कन्फ्युज होगैनु हो। ठाकुर गोचा आपन मैगर गोचि जयाहँ फोन लगैल रल्ह। संघर्या कबकब बिच डगरसम् लिह आस्याकल् रल्हि। बुधौरा गाऊँ, नारायणपुर नगरपालिका।

डग्रिम जयाजीक डिडिक घर चिया पिवाई हुइल्। मै हुँकाहर डिडिहँ अप्नक ठर्वा का कर्ठ कैक पुछ्नु। बिडेस् कलि। डग्रिम एकठो नसुग्घर जन्यावा कन्डी पाठटहि। म्वार ड्वासर सौख फोटु खिंच्ना फे हो। मै फोटु खिच्डेनु हुँकाहार।

ठार्ह खेट्व हुँकाहार घर पुग्ली। डाइबाबा व बाबु आगि टाप्टहिन्।हम्र फे अगोर्लि आगि। के के बाटो कैक पुछ्नु। घरम टिन्ठो छाई व छावाजुन बिडेस बा हुँ। जहाँ पुछ्बो उहाँ बिडेस्। गैल् डुई बरस आघ मै प्यूठान गैलब्याला वहाँक मनैन् पुछब्याला इन्डिया गाछन् कहँठ्। किऊ ठारु मनै निमिल्ना। बुधौरा फे ओस्ट।डाइ कहटहि कबुकाल ट मुवल् गोरुफँक्ना फे ठारु मनै निमिल्ठ। जन्नि जन्नि मिल्क फँकैठि हुँ। मै घरढुरी संख्या व खेतिपातिक बारेम जानकारी लेनु। २०० घरधुरी। हरेक घरसे एक जे ट बिडेस गैल् बाट गैल् बाट। आभिन् ट कौनो कौनो घरसे डु टिन जे गैल् बाट हुँ। किऊ दुबई, कतार, मलेसिया ट किऊ साउदी अरेबिया। साट आठ् कक्षासम् पहर्ना। फेल हुइलसे पास हुइना ठाऊँ बिडेस। असिन बा बुधौराक परिस्थिति। घर परिवार, समाज व देस बनैना जोस, शक्ति व ज्ञान ट बिदेसक माटिम खर्च हुइटा। कसिक बनी देश। पर्हक छोर्क बिदेस कुड लग्लसे भबिष्य लहड्रम गैगिल् जे।

जग्गा जमिन फे खास कम ट निहुइटिन् ऊ गाउँक। कर्क खाइकभचि ट खेटि पला बाटिन्। लहर ट भैगिल्। यिह कारण फे किऊ क्याकर जन्नी भगैना किऊ क्याकर भगैना। अउर ठर्वा लेकपैल्हक ठर्वहँ लाखौंक रिनम फसैना जसिन ढन्ढा फे हुइठिन् वहाँ। महा दर्दनाक जिन्गी लागल् वहाँक। हमार थारु जाटिन् कैह्या बुद्धि खुलहिन् कनाहस् डर लागल्। चिन्टा लागल् कैह्या विकासहँ उँक्वार लेबि कना। हाँ, लवँर्यनक पह्राइक अवस्था फे खास मजा निहुटन्। मै ट पहर्क आँखि हेर्ना, डुन्या डेख्ना सुझाब डेक अइनु।

लोकल मुर्गिक सिकार अघाला लेले कल्वा खाइल् पाछ पुरन्या कुवँम फोटु खिचैली। वाकर मजा छुट्ट। हमारसंगजया साइकल् लेल निक्रलि बजारसम्क लाग। उह साइकल्म टिन्यो जे चहुर्क चलाइल् फोटु खिचैली। फेसबुकम दांगसे बाँके बर्दियासम् उढारी साइकल्म यात्रा कैक लिख्डेलि। अस्ट ट हो। फेसबुकम लाइक व कमेन्ट कमैना ढन्ढा।

सागरजी हुँक्र कब नेंग्ल हम्र मटलब निढर्ली। हमार माहोल फरक रह। तुल्सीपुरसे करिब एक बजेक बस पक्रली नेपालगंजक लाग। का कर्ना हो, मन ट कहटह आभिन दांग घुमु व बुझुँ यहाँक माहोल्। गोट्यार गाउँ जैना रहर।हमार पहिलक पुर्खन बैठ्लक ठानगाऊँ जैना रहर। बिच डग्रिम छोर्क न्याँग परल्। जया जी कटि रल्हि आझ राट रहिलेऊ। टर उहोंर लब भाइक फोन आको आइ। छावा चुम्मर निरहिन्। म्वार जन्नी कब घुम्बो नेपालगंज कटि फोन कर्टि रल्हि। मै नेंग्गैली कैक ठग्टि रहुँ। ठाकुर गोचक असिन फोन कहाँ रहहिन्। नाऊ अकेला, ज्यान फे अकल्ह्य। ड्वासर फोन भर घनघन बोलिन्। छैलिन्क फोन का। भ्वाज हालहाल निकर्बो ट असिन फोन अइठा ना? मैया लग्टिक। उहमार छोटिह उमेरम भ्वाज जिन कर्बि। आपन ग्वारम ठर्ह्याल् पाछकेल् भ्वाज कर्बि। आपन कमाहि हुइलसे केल इज्जत व सानसे भ्वाज कर्बि।

डगरभर रियल् लब स्टोरिक चर्चा चलल्। बस, रिक्सावाला खर्चा मंग्ल ट बल्ल पटा मिलल् नेपालगंजक पुष्पलाल चौक पुग राखल् रहि कैक। अंढार होस्याकल् रह। ठाकुर गोचा व लब भाइ चल्जैना बिचार कर्ल। म्वार ठ्वाँठ्य्रा बाइक उठाक नाम्डेल बर्दिया। मै पलि रनु कोठरी व बुधौराक सम्झना लेल नेपालगंजम।