थारु होमस्टेका महिला अहिले अंग्रेजी सिक्नमा व्यस्त छन् । तीन वर्ष अगाडि नवलपरासीको कावासोती –१५ अमलटारी गाउँलाई थारु होमस्टेको रुपमा सञ्चालन गरेपछि यहाँका महिलामा अंग्रेजी मोह बढेको हो ।
पाहुनाको स्वागत सत्कारदेखि खाना र बासका लागि महिलालेनै बढी काम गर्ने भएकाले महिलाले अंग्रेजी सिकाउन माग गरेपछि अमलटारी थारु होमस्टेले प्रशिक्षक नियुक्त गरेर अंग्रेजी सिकाएको होमस्टेका व्यवस्थापक धनीराम गुरौले जानकारी दिए ।
‘९० दिनको सामान्य अंग्रेजी बोलचालको अभ्यास गराएका छौं’ व्यवस्थापक गुरौले भने ‘विदेशी पाहुना वर्षको ६ सयको हाराहारीमा आउँछन्, उनीहरुको लागि अंग्रेजी चाहियो त्यसैले सिकाएका हौं ।’
नेचर गाइडको रुपमा समेत काम गरिसकेका अंग्रेजी भाषामा दख्खल राख्ने धनबहादुर मर्दनियाले ३० जना थारु महिलालाई अंग्रेजी सिकाइरहेका छन्।