सन्तोष दहित– दाङ- पूर्व कमलरी कमला चौधरी आजकाल भेट्ना कर्रा पर्ठा, काजेकी उहा एक्ठो व्यवसायी हुइटी। भोटभोट्या बनैना मिस्त्री जिल्लाके एक्कठो जन्नी मनैया कमला हुइटी। झ्वाट्ट ह्यारवेर जन्नी मनै भोटभोट्या बनैइना कम डेख्लसेफे सोनपुर १ नर्तिके २३ वर्षीया कमला चौधरीके दिनभर भोटभोट्या बनैनाम दिन वित्थन।
हमार समाजम आम्हिन फे जन्नी मनै थारुसरह कामकर निसेक्ठ कना गलत धारणाह कमलाके यी कामले उदाहरणके पात्र बन्न सफल होरली। कौन समय कमलके हातभर जुठा, भाडा रहन, औरजन्हक घरम कमलरी वैस पुग्लक कमल अजष् मुक्तिके साथ सफल व्यवसायिके रुपम चिनगैल बाटी। कमलरी बैस्बेर चार रुपैया ड्याख फे मुस्किलले पर्ना उहान दैनिक पाँचसय से ध्यार बचत कर्टि आइलबाटी।
‘जन्नी मनै फे थारुसरह काम कर सेक्ठ’ कना कहाइह उदाहरणम परिणत कर्लक सोनपुर १ नर्तीके कमल। उहाँ दाङ जिल्लाके एक्कठो भोटभोट्या बनैना मिस्त्री हुइटी। ‘म्वार रुचि हुइलक कारण फे मै यी क्षेत्रम लग्लक हुँ, उहा कलि– हमार समाजम जन्नी मन कुछ करनिसेक्ट कना गलत सोच बा तर हम्र जन्नी मनै फे ज्या काम फे कर सेक्ठी।’
‘कमला विहान ८ बजेसे सन्य्लक ७ बजेसम कामम डटल रठि। विहान्ख काम अइठु, दिनभर भोटभोट्या बनैना काम कर्ठु, हरेक दिन लौव लौव काम सिख्ना अवसर मिल्ठा’ कमला बटोइथी–’सीप सिक्लसे किउ फे ह्याप नि सेक्ट।
एक फ्यारा कमलसे बनैलक भोटभोट्या बनैइना मनै फे उहाँसे नियमिति बनाइ अइठ। तर, कबुकाल  भोटभोट्या बनाए अइना लौव मनै महिसे विश्वास निकरसकक कर्ठ, थारु मिस्त्री खोज्ठ पाछ उहाँ नै भोटभोट्या बनाडेलसे दंगपर्ठ। ‘शुरुम मिस्त्री खोज्ठ, मै हुँ कहबेर हो र डादु खै निहुइट कठ– मै ट हुँ भोटभोट्या बनैइना मिस्त्री, का विग्रल बा हेर्ठु ओ भोटभोट्या बनाडेठु ट खुशि हुइठ, कमला बटोइठी।’ ‘आजका भोटभोट्याके वहारिक सक्कु बनाई सेक्ठु, सुस्ट सुस्ट इन्जिनफे बनाई सिक्टु बाटु।’
कमला अत्रा व्याला भोटभोट्या बनैना काम आइल निहुइटी। असाहय बाबुहुकने गोही एफ.एन.सीसे कम्लरी बैसल व्याला उद्धार कैख कक्षा १० सम्म निशुल्क पह्राहख स्वरोजगारके लाग उहाँन भोटभोट्या बनैना  मिस्त्री बनाइक लाग सानोठिमी भक्तपुर काठमाण्डुम पठागिलरह। ६ महिनास उहाँ तालिम लेलि एक महिना ओजेटी कर्ली।
वाकरपाछ लमहिम यमाहा शोरुमम थप काम सिख्ली। आजकाल आपन गोहिहुकनसे मिल्क आपन वर्कसप खोल्रख्ली। ‘यी शोरुमम म्वार लगानी बा’– उहाँ कली–’७० हजार शोरुमम लगानी कर्लबाटु।’ कम्लरीहुकनके ख्वाल सहकारी सस्था लावाजुनीमसे उहाँ ७० हजार ऋणलेख यी व्यवसायिम लग्लक हुइटी। ‘सहकारीमसे लिहल ७० हजार ऋण फे तिर सेक्नु, दैनिक ५ सय बचत कर्टी बाटु’ कमला बटोइठी–’सीप सिक्लसे ट पैसा कमैइना भारि बात निहो, पसलमसे अइलक पैसाले घरखर्च चलाख फे बचतकरक डेख्ख घरपरिवारफे खुशिबाट।’