सन्तोष दहित- पूर्व कम्लरी एवम पुर्व सभासद नेकपा एमाले क्षेत्र नं २ के उम्मेदवार शान्ता चौधरीको चुनावी माहोल बहर्टिबाटिन। चौधरी अत्रा व्याला कम्लरीहुकनके समस्या लगायत वर्गिय आवाज उठैइटी जनताहुकनके घर घरम पुग्ख आपन पक्षम मतदान करकलाग गाँउ गाँउम खटलबाटी। चौधरीह जिताइकलाग सयौंके कार्यकर्ता, वुद्धिजीवि, स्थानिय जनता, पुर्वकलरी, मुक्त कमैया समाज, भूमहिन लगायत लागि परलबाट। 
चौधरी पहिलाके संविधान सभाम नेकपा एमालेके तरफसे समानुपातिम सभासद फे बनस्याकल बाटी। चौधरी उ व्याला घोराही नगरपालिका ओ पुर्व लक्ष्मीपुर गाविसम जोरजैनो सिस्ने खोलाके पुल आपन लगानीम बनाख डेखादेरख्ली। ओस्टक लक्ष्मीपुर, रामपुर लगायत विभिन्न गाविसमा फे विजुली पुगाडेलबाटी। १८ वर्ष सम्म कम्लरी जिवन वितैइलक चौधरी सभासद बनल व्याला पुर्वकम्लरीहुकने लाग १२ करोड बजेट फे छुत्याइलगैइली। असिन प्रंशसनिय काम डेख्ख फे क्षेत्र नं २ के जनता शान्ता चौधरीप्रति बहुट खुशिबाट।
करिब दुई दशक कमलरी लागल मनै शान्ता चौधरी गाँउके विकासठेसे देश बनइनाम बहुट योगदान डेख्खफे क्षेत्र नं. २ के जनता उत्साहित हुइलक लक्ष्मीपुर ७ सुनपुरके सन्तोष पौडेल बटोइटठ। बहुट मिलनसार, स्वाभावके रुपम चिन्जैना शान्ता चौधरी आपन गाँउ केल निहो सम्रग देश ओ गरिब जनताके पक्षम आवाज उठैइटी अइलक ओर्से उहक पाछ क्षेत्र नं. २ म जनलहर बन्टी गैइलक पौडेल कठ। मै फे उहाँक स्वाभाव ओ डेशके नेतृत्व करसेक्ना हुइलक ओर्से स• शान्ताके पक्षम भोट माँग न्यागलबाट पौडेल बटोइठ। यी डेशके सर्वहारा वर्ग ओ हमार देशके वर्गिय नेता कलक शान्ता हुइटी उहमार फे क्षेत्र नं. २ के अधिकांश जनता शान्ताके पक्षम लागल बाट।
सद्दभर पानीम दुपदुप बजार जाइपर शान्ता दिदि पुल बनादेली त हमन सजिलो बा लक्ष्मीपुर ४ लक्ष्मीपुरके सर्मिला चौधरीकली। वर्खाके समयम दिनभरि करल टिनाटाउन ओस्टह सरजाई व्याच जाइकलसे बहार अइना टुरल टिना फे सक्कु कुजाए अखिस शान्ता दिदि पुल बनैली ट हमन सजिलो बा सर्मिला कलि। उहाओर्से हम्र शान्ताह जीताइकलाग लागलबाटी। उहा जितही ट काल यी डगर फे बनादेनबाटी। औरज कैयो फ्यारा जीटख गैल कुछु नि कर्ल तर शान्ता नेता बन्टीके ध्यार विकास कैसेक्ल सर्मिला बटोइली। असहक गाँउक अधिकांस गरिबन्क लर्का पर्का पह्र निपैना, ध्यारसे ध्यार कमलरी, कमैया जैना करट सर्मिला कली आजकाल शान्ता दिदि उ गरिब जनतनके लर्कापर्कान फे निशुल्क पहर्ना बाताबरण बनादेलक सर्मिला चौधरी बटोइली।
ओस्टक लक्ष्मीपुरके खुमा थापा फे कठि –“हमार गाँउ अन्धार अन्धार रह, सक्कुओर विजुली बर्ना तर हमार गाँउ अन्धार रह पाछ शान्ता दिदि नेता बन्ली ट आजकाल हमार गाँउकेल निहोख सक्कुओर दिदिके पहलमा बिजुलीके सुविधा निपाइल रामपुर लक्ष्मीपुरझकमक बा।”
रामपुर, लक्ष्मीपुर त उदाहरणके हो शान्ता चौधरी सभासद रहलम बहुट काम कर्लक रामपुरके एक वुद्धिजीवि राममणी पाण्डेय बटोइठ। शान्ता पहाडी गाविसके जनताहकुनके फे बहुट काम कर्लक पाण्डेय बटोइठ। शान्ता सभासद रहल व्याला आपन सांसद कोष सक्कु जनतनहक पक्षमकेल काम लगैलक ओर्सेफे दाङ क्षेत्र नं २ के जनता शान्ता चौधरीह जिताइकलाग आतुर रलक पाण्डेय बटोइठ। और पार्टीक मनै सांसद कोषके पैस्ाा कार्यकर्ताहुकन मार्फत चलैलक कारण ओत्रा प्रभावकारी निहुइलक कारण फे ध्यारसे ध्यार जनता और नेताहुकनसे ध्यार एमालेके उम्मेदवार पुर्व कमलरी शान्ता चौधरीह रोज्लक पाण्डेयके कहाइबाटन।
पूर्व कम्लरी एव क्षेत्र नं २ के उम्मेदवार शान्ता चौधरीफे अखिसके निर्वाचनम मैगर जनताहुक्र प्रत्यक्षमा महिह जिताक पठैइले ३ वर्षम क्षेत्र नं.२ के मुहार फेरदेना दाबी कर्ठी। और नेताहुकनक नन्ह मै जनतन आश्वासन दिह निजन्टु। यदि मै बोल्ठु कलसे उ काम करख डेखैठु चौधरी कली। मै विगतके संविधान सभाके सभासद रहल व्याल म्वार क्षेत्र म करल काम ओ उहाँक स्थानिय जनतन फे पुछसेक्ठी चौधरी कली। अखिसके हुइना संविधान सभाके निर्वाचनम आपन पहिला एजेण्डा कलक जनमुखि संविधान बनैना द्धासर विकासके कामह आघ वह्रैना चौधरीके कहाइबाटन। क्षेत्र नं २ म कसिन कसिन काम कर्ना कलक प्रतिवद्धता पत्रम उल्लेख कैसेक्लक बटौइटी चौधरी कलि– उ प्रतिवद्धपत्रम फे बहुट छुटलबा, छुटल बातह फे संगसंग लेख काम आघ वह्रैना बटोइली। तर यी प्रतिवद्धताह कार्यान्वयन करक लाग यीहाक जनता महिह जितैइलसेकेल समयम हुइसेकी चौधरी कली। तर मै हरलसे फे कुछ काम करम लेकीन बरा बरा काम करलाग जितपर्ना जरुरी रलक चौधरीके कहाइबाटन।