लखन चौधरी/धनगढी
साउन २२ गतेसे आन्दोलनरत थरुहट आन्दोलनकारीहुक्रे चार दलके शिर्ष नेताहुक्रे अभिन फेन ६ प्रदेशके सहमति सच्याके इमान्दारीता नैदेखैलेसे थरुहट प्रदेशके सिमांकन अप्नही कर्ना चेतावनी देले बाटै।
शनिच्चरके रोज धनगढीके क्याम्पस चौंकसे चौराहासम विरोध प्रर्दशन करके आयोजित कोणसभाहे सम्बोधन करटी आन्दोलनकारी नेताहुक्रे राज्यके शासकहुक्रे आदिवासी थारू समुदायहे सदियौंसे उत्पीडिनमे परटी आइल बटैटी थरुहट प्रदेशके अप्नही सीमा रेखा कोर्ना चेतावनी देहल हुइट।
कोण सभाहे सम्बोधन करटी पूर्व सभासद तथा रानाथारू अगुवा मालामति रानाथारू चार दलसे हुइल ६ प्रदेशके सिमांकनके खाका अप्नेहुकन मान्य नैरहल बटैटी कैलाली–कञ्चनपुरसे चितवनसमके जिल्लाहे थरुहट बनाके छोर्ना ठोकुवा कर्ली। थरुहट आन्दोलनमे रानाथारु समुदायके पूर्ण समर्थन रहल बटैटी उहाँ थरुहट प्रदेशके लाग जसिन फेन आन्दोलन कर्ना तयार रहल प्रतिवद्धता जनैली।
सदियौंसे अप्ने थातथलोमे उत्पीडनमे परटी आइल थारू समुदायहे अभिनमे उत्पीडनके सिकार बनैना खालके चार दलसे सिमांकन हुइल बटैटी पूर्व सभासद राना चार दलीय शिर्ष नेताहुकन कैलालीमे प्रवेश बन्देज रहल चेतावनी देली। साथे उहाँ चार दलीय नेताहुक्रे अभिन फेन थरुहट प्रदेश कायम करके ६ प्रदेशके सहमति नैसच्याइलेसे थरुहट प्रदेशके खाका अप्नही कोर्ना फेन चेतावनी देली।
ओस्तके कार्यक्रममे मधेसी जनाधिकार फोरम लोकतान्त्रिकके वरिष्ठ जिल्ला उपाध्यक्ष गयाप्रसाद कुश्मी, थाकस केन्द्रीय महामन्त्री इन्दिरा चौधरी, नेपाली काँग्रेस कैलाली सचिव रामचरण चौधरी फेन कोणसभाहे सम्बोधन करल रहिट।
आन्दोलनके ९ औं दिन अर्थात शनिच्चरके रोज थरुहट आन्दोलनकारीहुक्रे सशक्त शक्ति प्रर्दशन कर्ले बाटै। गाउँ गाउँसे आइल सर्वसाधारणके उल्लेख्य संख्यासे सदरमुकाम धनगढीमे प्रदर्शन हुइल बा।
आघे–आघे मोटरसाईकल पाछे–पाछे थारूजन्नीसहितके जुलुस प्रदर्शन हुइल रहे। अखण्ड सुदूरपश्चिम संगसे दोहोरो झडपके सम्भवनाहे मध्यनजर करके जुलुसहे प्रहरी जिविस चोकसे आघे बह्रे नैदेना रणनीति अप्नैले रहे। मने पाछे थारू नेताहुक्रे सशक्त धिउर संख्यामे जनसहभागितासहितके जुलुश ट्राफिक चौराहा पुगैले रहिट।
यहेबीच शनिच्चरके रोज जिल्लाके टीकापुर लम्की, बौनियालगायत बजार तनावग्रस्त बनल रहे।
अज्ञात मनैनसे ट्रकमे आगजनी
कैलालीके चौमाला क्षेत्रमे शुकके रात एकठो ट्रकमे अगजनि हुइल बा। अप्नेहुक्रे बन्दकर्ता रहल बटुइया अज्ञात व्यक्तिहुक्रे बन्दके अवज्ञा करक कहटी बिरगञ्जसे महेन्द्रनगर ओहोर मुर्गीनके दाना लेके जैटी रहल ना ४ ख ८४८८ न. के ट्रकमे आगी लगाइल हुइलट।
जिल्ला प्रहरी कार्यालयके डिएसपी विश्वराज खड्का ट्रक चालक गणेश मल्लहे उदृत करटी ट्रक रोके लगाके पेट्रोल छरकके आगी लगाइल बटैलै। उहाँके अनुसार करिब सात/आठ जहनके समुहमे आइल अपरिचित व्यक्तिहुक्रे अगजनि करल जानकारी देलै।
ट्रकमे अगजनि हुइल खबर पैटीकिल इलाका प्रहरी कार्यालयके टोली उ स्थानमे पुगके आगी बुटाइल रहे। आगी लगाइल कुछ समयमे अप्नेहुक्रे उ स्थानमे पुगल ओ करिब १० मिनेटमे आगी नियन्त्रणमे आइल इलाका प्रहरी कार्यालय चौमालाके इन्चार्ज प्रहरी नायब निरीक्षक शंकर पन्त बटैलै।
उहाँके अनुसार उ ट्रकमे रहल ७५ प्रतिशत दाना बचैना प्रहरी सफल हुइल बा। आगी लगाइल ट्रकके आघेक इन्जन पूर्ण रुपमे जरके नष्ट हुइल बा। आगी लगाइल उ ट्रक धनगढीके मदन राज जोशीके रहल जनागिल बा।
भिडियो हेर्नुस्: